УИХ-ын гишүүн А.Ундраагаас цаг үеийн асуудлаар тодрууллаа.

-Ээлжит бус чуулган өчигдөр хаалтаа хийлээ. Ээлжит бус чуулганыг хэрхэн дүгнэж байна вэ?

-Ээлжит бус чуулган төлөвлөсөн ажлаа сайн гүйцэтгэлээ. Мэдээж улс төрийн зарим тодорхойгүй нөхцөл байдал үүсч хурал завсарлах, хойшлох асуудал гарсан. Гэхдээ үндсэн зорилго буюу Үндсэн хуулийн хоёрдугаар хэлэлцүүлгийг хийж дуусгана гэдэг түүхэн томоохон ажил. Ард түмнээсээ асууж эцэслэн батлагдана. Энэ парламентын үед хийгдэх хамгийн том ажил бол 20 жил хүлээсэн Үндсэн хуулийн өөрчлөлт юм. Тэр утгаараа ээлжит бус чуулган үүргээ сайн гүйцэтгэсэн гэж харж байна.

-Ээлжит бус чуулган үр дүнгүй талцсаар байгаад өнгөрлөө гэж зарим иргэд шүүмжлэлтэй хандаж байна. Ард нийт ээлжит бус сонгуулийг дэмжих болов уу?

-Иргэд Үндсэн хуулийн нэмэлт, өөрчлөлтөд ямар ямар өөрчлөлт орсон, энэ нь ямар учир шалтгаанаар орсон гэдэгт ихэд анхаарал хандуулж байна. Гэхдээ зарим сигментүүд мэдээллийг тэр бүр авч чадахгүй байна. Саяхан залуучуудын дунд "Залуусын дуу хоолой" арга хэмжээ зохион байгуулсан. Энэ үеэр Үндсэн хуулийн нэмэлт өөрчлөлтийн талаар танилцуулахад анхаарал тавьж байсан нь харагдсан. Ер нь Үндсэн хуульд оруулах нэмэлт, өөрчлөлтийн талаар төрийн албаныхан болон хэвлэл мэдээдллийн ажилтнууд мэдээлэлд илүү ойр байна. Харин хувиараа хөдөлмөр эрхэлж байгаа болон оюутнууд энэ талаар ойлголтгүй байна. Тиймээс ард нийтийн санал асуулга явуулахаас өмнө хүн амын сигмент бүрт мэдээлэл, тайлбар өгөх шаардлагатай гэж үзэж байна.

-Энэ талаар гишүүд иргэдэд мэдээлэл өгөх, санал авах зорилгоор тойрогтоо ажилласан шүү дээ. Танай тойргийн иргэдийн хувьд Үндсэн хуулийн нэмэлт, өөрчлөлтийн талаар ямар санал хэлсэн бэ?

-Манай тойрог нийслэлийг төвийн дүүргүүдийн нэг учраас мэдээлэл сайтай байдаг. Хүн ам зүйн хувьд ч гэсэн телевиз, радио, хэвлэл хийгээд цахим сүлжээ зэрэг мэдээлэл сайн хүрдэг байршилд байдаг. Мөн ажил эрхлэлтийн хувьд ч гэсэн өндөр. Ерөнхийдөө ажил эрхэлдэг иргэдийн мэдээлэл авч байгаа хэмжээ өндөр байна. Энэ утгаар Баянгол дүүргийнхээ иргэдэд Үндсэн хуулийн нэмэлт, өөрчлөлтийг танилцуулах зорилгоор Д.Лүндээжанцан, А.Ганбаатар гишүүдтэй хамтран тайлбарлаж, ярилцсан. Уулзалтад оролцсон болон бичгээр санал хүргүүлсэн иргэдийн дийлэнх нь Үндсэн хуулийн өөрчлөлтийг дэмжсэн. Мөн шүүмжлэлтэй хандсан зарим саналуудыг эмхтгээд хэлэлцүүлэгт оруулсан. Гэвч зарим саналуудыг хэлэлцүүлэгт тусгаж чадаагүй.

-Ерөнхийлөгчийн хүргүүлсэн саналд ямар байр суурьтай байгаа вэ?

-62 гишүүний өргөн барьсан төсөлд Ерөнхийлөгчийн саналыг аль болох тусгах чиглэлээр зөвшилцлийн баг ажилласан. Зарим саналуудаа хэлэлцүүлгийн дараа татаж авна гэсэн ойлгомжгүй байдал үүсгэсэн байж болзошгүй. Гэхдээ нэгэнт Их Хуралд өргөн баригдсан хууль тогтоох дээд байгууллага хэлэлцсэн текстийнхээ хүрээнд ажлаа явуулах ёстой.

Б.Лхам