АН-ын дарга С.Эрдэнийн балаг тасрахгүй нь. АН-ыг “амь тавиулж” байгаа хэмээн гишүүд, дэмжигчдээсээ шүүмжлэл хүртэх болсон тэрбээр энэ удаад яамны мэргэжилтэнг хөлдөө чирэх нь. Тодруулбал, Хүнс, хөдөө аж ахуй хөнгөн үйлдвэрийн яамны ахлах мэргэжилтэн Н.Ариунболд, "Дархан гурил тэжээл" ХК-ийн Санхүү эрхэлсэн захирал С.Намсрайжав нарыг  Авлигатай тэмцэх газраас саатуулан шалгаж эхэлжээ. Энэ талаар тус газраас “Ийм ажиллагаа явагдсан нь үнэн. Хоёр хүнийг 48 цагийн хугацаатай саатуулан шалгаж байна. Үргэлжлүүлэн хорих эсэх нь шүүхээр шийдвэрлэнэ” хэмээх тайлбарыг өгөөд байгаа юм. Тэгвэл салбар хариуцсан яамны хоёр мэргэжилтэнг саатуулах болсон шалтгаан нь АН-ын дарга С.Эрдэнэтэй холбоотой гэдгийг учир мэдэх нэгэн хэлж байна. Тодруулбал, АН эрх барьж, С.Эрдэнэ сайдаар ажиллаж байсан үетэй уг хэрэг хамааралтай бололтой.

Учрыг сийрүүлбэл, 2014-2015 оны үед Хүнс, хөдөө аж ахуйн яамнаас Үр тариа хадгалах элеватор худалдан авах тендер зарлаж байжээ. Тухайн үед уг тендерт Дарханы нэгэн компани дөрвөн тэрбумаар элеватор худалдах санал ирүүлсэн байна. Энэ дагуу яамны тендерийн Үнэлгээний хорооныхон очиж танилцахад тухайн элеватор нь эвдэрч, хуучирсан, чанарын шаардлага хангахааргүй байсан байна.

Тиймээс Үнэлгээний хорооныхон татгалзсан хариу өгч байжээ. Сонирхолтой нь, тухайн үед Хүн амын хөгжил, Нийгмийн хамгааллын сайдаар ажиллаж байсан С.Эрдэнийн төрсөн охины удирддаг компанийн эзэмшилд уг элеватор очсон байх юм. Нэг үгээр, яамнаас зарласан тендерийн болзлыг хангаагүй эвдэрхий элеваторыг С.Эрдэнэ сайдын охины эзэмшдэг компанийн нэрээр дахин шалгаруулалтад оруулж, бүр 12 тэрбумаар төрд шахжээ. Харин Авлигатай тэмцэх газраас саатуулсан хоёр мэргэжилтний нэг нь тухайн үед Үнэлгээний хорооны бүрэлдэхүүнд ажиллаж байсан нэгэн юм байна.

Ийнхүү АН-ын дарга С.Эрдэнийг сайд байхдаа охиныхоо нэр дээрх компаниар дамжуулан анхны үнэлгээнээс нь гурав дахин их өртгөөр төрд шахсан элеваторын асуудал хуулийн байгууллагын хараанд өртөж, хоёр хүнийг саатуулах шалтгаан болсон бололтой. Сүүлд АН-ын дарга С.Эрдэнийг “Дархан гурил тэжээл” ХК-ийн томоохон хувьцаа эзэмшигч болсон гэх баримтыг зарим хэвлэлээр гарч байсан удаатай. Тухайн мэдээлэлд дурдсанаар түүний охин Э.Содгэрэл нь “Дархан гурил тэжээл” ХК-ийн нийт 550527 хувьцааны 152131-ийг нь эзэмшдэг тухай дурдаж байсан юм.

С.Сүлд