Засгийн газар өнөөдрийн ээлжит хуралдаанаар хүүхдийн мөнгийг арилжааны банкуудаар дамжуулахгүйгээр Төрийн сангаас олгож байх шийдвэрийг гаргасан байна. Тодруулбал, сар бүрийн 20-ны өдөр тухайн хүүхдийн дансанд мөнгө байршдаг байх зохицуулалт хийжээ. Учир нь хүүхдийн мөнгийг арилжааны банкаар дамжуулах нь ажиллагаа ихтэйгээс гадна явдал чирэгдэл ихтэй байдаг юм байна. Тиймээс Төрийн сангаар дамжуулахаар болсон байна.
Өнөөдрийн байдлаар нийт 1 сая хүүхдэд 231.2 тэрбум төгрөгийн хүүхдийн мөнгө олгосон болон Газрын тос боловсруулах үйлдвэрийн талаар Засгийн газрын ХМОНХХ-ийн дарга Ц.Ганзориг танилцууллаа. Тэрбээр “Дорноговь аймгийн Алтанширээ суманд баригдаж байгаа газрын тос боловсруулах үйлдвэрийн хэрэгцээнд 250 га газрыг улсын тусгай хэрэгцээнд авах шийдвэрийг Засгийн газрын ээлжит хуралдаанаар гаргалаа. Өөрөөр хэлбэл, өмнө нь 150 га газрыг газрын тосны үйлдвэрийн тусгай хэрэгцээнд авсан байсан. Нэмэлтээр 250 га газрыг мөн тусгай хэрэгцээнд авснаар нийтдээ 400 га газрыг газрын тос боловсруулах үйлдвэрийн тусгай хэрэгцээнд авч байна гэсэн үг. Энэ сарын 8-ны өдөр Энэтхэгийн Ерөнхий сайд манай улсад айлчилна. Энэ үеэр Ерөнхий сайд У.Хүрэлсүх Дорноговь аймгийн Алтанширээ суманд баригдаж байгаа газрын тос боловсруулах үйлдвэрийн бүтээн байгуулалт болон дэд бүтцийн явцтай танилцана. Үйлдвэрийн бүтээн байгуулалтын ажлууд богино хугацаанд хийгдэж дууссан. Төмөр зам, автозам, цахилгаан дамжуулах шугам зэрэг хийгдэж дууссан. Үүнтэй холбогдуулан газрын тосны үйлдвэрийн хүнд тоног төхөөрөмжүүдийг зөөвөрлөх ажил ирэх 2020 оны гуравдугаар сараас эхэлнэ. Үйлдвэрийн ТЭЗҮ ирэх арваннэгдүгээр сар гэхэд эцэслэгдэн гарна.
Монгол Улсын Ерөнхийлөгч Х.Баттулга Энэтхэг улсад хийсэн айлчлалын үеэр 236 сая ам.долларын нэмэлт санхүүжилтийг олгох болсноо Энэтхэгийн тал илэрхийлсэн. Ингэснээр 1 тэрбум 260 сая ам.доллараар газрын тос боловсруулах үйлдвэрийг барина. Бүтээн байгуулалт 2023 он гэхэд хийгдэж дуусна.
Тус газрын тос боловсруулах үйлдвэр ашиглалтад орсноор 600-700 орчим ажлын байр бий болж, ам.долларын гадагшаа урсгал жилдээ 20-30 хувиар хэмнэнэ. Өөрөөр хэлбэл, 1 тэрбум ам.доллар Монголдоо үлдэж, төгрөгийн ханш ам.долларын эсрэг мөн 20-30 хувиар чангарах боломжтой. Ингэснээр иргэдийн бодит орлого өсч, улсын болон орон нутгийн татварын орлого нэмэгдэнэ. Түүнчлэн гадагшаа урсдаг байсан 150 сая ам.доллар хэмнэх боломжтой. Дотоодоосоо шатахуунаа худалдаж авах, гаднын зах зээлийн үнийн савлагаанд өртөхгүй байх зэрэг олон эерэг талтай. Үйлдвэр байгуулах бүс нуагт ажилчдын амьдрах нөхцөлийг бүрдүүлэхээр ажиллаж байна. Үйлдвэр барих газрыг тэгшилж, цементэлсэн. ТЭЗҮ эцэслэгдсэн гэж үзэж болно. Тухайн үед мэдээлэл хийнэ” гэлээ.
