УИХ-ын гишүүн Т.Аюурсайхан гадаад улсад эрэн сурвалжлагдаж байгаа дипломат төлөөлөгчийн газар болон бусад төрийн байгууллагад ажилладаг иргэдийн нэрсийг зарласан. Үүнтэй холбогдуулан тэрбээр сэтгүүлчдэд мэдээлэл өглөө. Тэрбээр "Хар тамхи тээвэрлэж байгаад баригдсан дипломатуудын хэргийн араас Аюулгүй байдал, гадаад бодлогын байнгын хорооноос шуурхай арга хэмжээ аван ажиллаж байна. Байнгын хорооноос тогтоол баталсан. Тогтоолын хэрэгжилтийг хангуулж, хяналт тавьж байна. Дипломат төлөөлөгчийн газарт ажиллаж байгаа хүмүүс хууль бус хэрэгт холбогдох явдал хавтгайрсан. Үүнийг таслан зогсоохын тулд хариуцлага тооцохоос өөр аргагүй. Нэг удаа юм, хөөрхий минь гэж бодох ёсгүй. Зарим хүмүүс “Зүгээр л сордог тамхи ш дээ, ганц удаа шүү дээ” гэх байдлаар хүмүүс хандаж байна. Ингэж болохгүй ээ. Н.Батсайхан гэж хүн удаа дараа Элчин сайдын яамны ажилтан, зөвлөхөөр ажилласан. Тэр бүү хэл, Гадаад харилцааны сайд Цогтбаатарын тушаалаар Элчин сайдын үүрэгт ажлын хугацаа дуусангуут Элчингийн зөвлөхөөр ажиллаж байна. Цогтбаатар энэ хүнийг эрэн сурвалжлагдаж байгааг мэдэх ёстой хүний нэг. Түүний үүрэг шүү дээ. Энэ мэт олон хүн бий. хариуцлага тооцож байж үүнийг таслан зогсооно. Удахгүй тайлан мэдээг байнгын хороогоор хэлэлцүүлнэ. Хэрвээ ажил үүргээ хангалтгүй гүйцэтгэсэн бол сайдуудтай хариуцлага тооцох зүйл яригдана.

Энэ хэргийг задалсан нь улс төрийн ямар ч зорилгогүй. Өнгөрсөн зургадугаар сард байнгын хорооны даргын нэр дээр шаардаж авсан. Гэтэл нууцын тамга дарсан байсан. энэ утгаараа тодорхой мэдээлэл өгч чадаагүй. Яагаад нууцын тэмдэгтэй байсан бэ гэхээр гадаад улсад ял эдэлж байгаа хүмүүсийн нэрстэй хамтатгаж, нэг албан тоотоор ирүүлсэн. Тиймээс дахин албан шаардлага хүргүүлж байж, нууцын тамгагүй авсан. Үүнийгээ хэвлэлийнхэнд дэлгэсэн. 2009 оноос хойш эрэн сурвалжлагдаж байгаа хүмүүсийн нэрсийг зарлаагүй юм бэ. Тэр бүү хэл, дипломат албанд удаа дараа томилсон байна. Тиймээс хариуцлага тооцно. Тэгж байж энэ асуудал цэгцэрнэ” гэлээ.