УИХ-ын намрын чуулганы хуралдаан үргэлжилж байна. Хуралдаанаар 2020 оны төсөв болон хамт өргөн мэдүүлсэн хуулийн төслүүдийг үргэлжлүүлэн хэлэлцэж байна. Үүнтэй холбоотойгоор гишүүд асууж, хариулт авлаа.

УИХ-ын гишүүн Д.Хаянхярваа: Ирэх оны төсөв тийм ч муу төсөв болоогүй. Нийгмийн хамгааллын чиглэлээр Засгийн газрын мөрийн хөтөлбөрт туссан тодорхой заалтуудыг хэрэгжүүлэх чиглэлээр ахиц гарсан төсөв. Нийгмийн даатгалын сангаас олгох тэтгэвэр, тэтгэмжид нэмэлт, өөрчлөлт оруулах тухай, Эрүүл мэндийн даатгалын сангаас төр, хувийн хэвшлийн тарифийн зардлыг адил болгох зэрэг олон жил яригдсан намын мөрийн хөтөлбөр, Засгийн газрын мөрийн хөтөлбөрөөс шаарддаг асуудлыг зөв гольдрол руу нь оруулах, тодорхой түвшинд засч залруулах алхмуудыг хийсэн байна. Ялангуяа нийгмийн хамгааллын чиглэлийн төсөв зөв болжээ. Мэдээж төсвийг нэг удаагийн өөрчлөлтөөр бүрэн бүтэн, зөв гольдролд нь оруулна гэж байхгүй. Үүнтэй холбоотой зарим зүйлийг асууя. Төсвийн хөрөнгө оруулалтын бодлого хэрхэн явж байна гэж харж байна вэ. Эрүүл мэндийн салбарын мониторингийн хөрөнгө оруулалтад 19 орчим тэрбум төгрөг суугдсан байна. Үүнд эрс өөрчлөлт гаргах болоогүй юу. Хүн амын эрүүл мэндийн чиглэл гэж хамгийн чухал байна. Үүнийг дагаад тоног төхөөрөмжөө сайжруулах шаардлагатай байна. Мөн эрчим хүчний хямралд орно гэж сүүлийн үед мэргэжлийнхэн хэлж байна. Цаашид энэ хямралаас гарахын тулд ямар бодлого баримталж ажиллах вэ?

Сангийн сайд Ч.Хүрэлбаатар: Юуны өмнө төмөр замын ажлыг сайн хийх хэрэгтэй. Өртөг, зардал бага гаргавал Монголд үлдэх валютын хэмжээ нэмэгддэг. Гашуунсухайт-Зүүнбаян чиглэлийн замын бүтээн байгуулалт эхэлсэн. Үүнээс гадна Гашуунсухайт, Ханги Мандал зэрэг чиглэлийн авто замын ажлууд эхэлнэ гэж үзэж байна. Мөн хамгийн анхаарал тавьж буй зүйл бол аялал жуулчлал. Аялал жуулчлалыг нүдэнд харагддаггүй экспорт гэж нэрлэдэг. Энэ салбараас бид хэчнээн хэмжээний орлого олно тэр хэмжээгээр валют болдог болоосой гэж хүсч байна. Зарим орнууд аялал жуулчлалаараа манай бүх зэс, нүүрснээс их хэмжээний валют олж байна. Тиймээс бидэнд түүх, соёл, уламжлал зэрэг олон боломжууд бий учраас цаашид энэ салбарт ихээхэн анхаарал хандуулна.

Эрчим хүчний сайд Ц.Даваасүрэн: Эрчим хүчний хэрэглээ жилд дунджаар 80 мвт-аар өсч байгаа. Эх үүсвэрийг гаднын зээл тусламжийн хүрээнд шийдвэрлэхээр тусгагдаад явж байна. Тухайлбал, ирэх оны хэрэглээний өсөлтийг Эрдэнэтийн 35 мвт-ийн БНХАУ-ын зээлээр хийж байна. Мөн ОХУ-ын зээлээр IV цахилгаан станцын зарим төхөөрөмжийг шинэчилнэ. Эдгээр эх үүсвэрүүдээр шинэ хэрэглээний түгээлтийг гаргана. Харин хуучирч элэгдсэн орон нутгийн сүлжээ, дэд станц, шинэ суурьшлын бүсүүдэд төсөв тавигдаагүй.

Сангийн сайд Ч.Хүрэлбаатар: Хэд хоногийн өмнө би хөдөө орон нутагт жижиг хагалгаанд орсон юм. Энэ үеэр Сонгодогийн эмч нар үзээд нэг л зүйл хэлж байна лээ. Энэ салбарт хийгдэж байгаа хөрөнгө оруулатыг зөв болгох ёстой. Хүнд өвчний нэрийг хэлээд л баахан юм авахуулдаг. Гэтэл тэнд нь илүү байна. Эсвэл урсгал, зардал нь өндөр. Үүнийг цэгцлэхгүйгээр хэчнээн мөнгө хийгээд нэмэргүй. Тиймээс ил тод, цахим төсөв байх ёстой гэж хэлмээр байгаа юм. Тогтолцоо, хандлагаа зөв болгохгүй бол энэ шийдэл биш" гэлээ. 

Б.Лхам