УИХ-ын чуулганы нэгдсэн хуралдааны энэ долоо хоногт хэлэлцэх асуудлын жагсаалтад гишүүдийн ёс зүйн дүрмийг шинэчлэн найруулахаар төлөвлөжээ. Цаг хугацаа гэхээсээ нийгэмд үүссэн шүүмжлэлийн хүрээнд ёс зүйн журмаа өөрчлөхөөр болсон нь энэ байж болох. Учир нь УИХ-ын нэр бүхий гишүүний хөрөнгө орлого нь нэмэгдсэн тухай шүүмжлэл өнөөг хүртэл нийгэм, улс төрийн хүрээнд явсаар байгаа юм.
УИХ-ын гишүүдтэй холбоотой Ёс зүйн дүрэм гэж бий. Төрийн албан хаагчид биш түшээдэд хамаарал бүхий. УИХ-ын гишүүний тангараг өргөсөн л бол уг дүрмийг парламентын 76 гишүүн бүгдээрээ дагаж мөрдөх ёстой гэсэн үг. Энгийнээр тайлбарлавал УИХ-ын гишүүн хэмээх албан тушаал хуулиар халдашгүй дархан эрхийг нь нотлох “Очир” бүхий энгэрийн тэмдэг зүүснийхээ хувьд дагаж мөрдөх учиртай асуудлыг журамласан нь энэ.
УИХ-ын 2009 оны 34 дугаар тогтоолын хүрээнд өнөөг хүртэл мөрдөж ирсэн гишүүдийн ёс зүйтэй холбоотой зургаан заалт бүхий уг журмын:
Дөрөв. Хөрөнгө, орлогын мэдүүлэг, албан томилолттой холбогдсон ёс зүйн хэм хэмжээ
4.1. Гишүүн хууль тогтоомжид заасан хугацаа, журмын дагуу хөрөнгө, орлогын мэдүүлгээ үнэн зөв гаргах үүргээ сахин биелүүлнэ.
4.2. Гишүүн хууль тогтоомжоор зөвшөөрөгдсөний дагуу улс төрийн намд сонгуульт албан тушаал эрхлэх, сургалт, эрдэм шинжилгээний ажил хавсран гүйцэтгэснээс олох орлогын хэмжээ нь гишүүний жилийн үндсэн цалингийн 40 хувиас хэтрэхгүй байвал зохино.
4.3. Гишүүн иргэдийн боловсролыг дээшлүүлэх, оюуны хөгжилд хувь нэмэр оруулах зорилгоор яриа хийх, илтгэл тавих, өгүүлэл, ном бичсэнийхээ төлөө урамшуулал авч болох бөгөөд энэхүү орлогоо хөрөнгө, орлогын мэдүүлэгт заавал тусгана.
4.4. Гишүүн гадаад, дотоодод томилолт, аялалаар явахдаа эрх бүхий албан тушаалтны шийдвэрийг гаргуулах ба удирдамж, чиглэлийг чанд баримтална гэжээ.
УИХ-ын гишүүдийн ёс зүйтэй холбоотой асуудлыг зохицуулахаар өдгөөг хүртэл хэрэгжүүлж ирсэн уг журмаар ганцхан хүн хариуцлага хүлээсэн байдаг нь Засгийн газрын Хэрэг эрхлэх газрын дарга асан С.Баярцогт. Швейцарийн банкинд сая ам.доллараа мартсан тухай түүний мэдээллийг Олон улсын эрэн сурвалжлах сэтгүүлчдийн холбооноос задалсны дараа тэрбээр ёс зүйн хариуцлага хүлээж УИХ-ын дэд даргын албан тушаалаа өгсөн байдаг. УИХ-ын гишүүний баримтлах учиртай ёс зүйн дүрмийг “зөрчсөн”-ийг н ч Дэд хорооны дарга М.Батчимэг тэргүүтэй гишүүд хуралдаанаараа шийдвэрлэж нэгдсэн чуулганы хуралдаанд оруулсан байдаг.
Сонирхолтой нь, өнөөдөр С.Баярцогттой адилтгаж болохуйц бас нэгэн асуудал үүссэн нь УИХ-ын нэр бүхий гишүүдийн хөрөнгө орлого өмнөхөөсөө хэд дахин нэмэгдсэн тухай шуугиж эхэллээ. Ёс зүйн дэд хорооны дарга Б.Бат-Эрдэнэ хүртэл тэдгээр гишүүнийг зарлаж, холбогдох тайлбар өгөхийг хэвлэлээр дамжуулан шаардаж эхлэв. Үүнтэй холбогдуулж тэдгээр гишүүд түрүүчээсээ холбогдох тайлбараа өгсөн ч эхлээд дархан аварга Б.Бат-Эрдэнийг даргалдаг Ёс зүйн дэд хороо тэдний хөрөнгө яагаад өссөнийг, холбогдох тайлбарынх нь дагуу дэнслэнэ. Түүний дараа албан ёсны алх цохиж, ёс зүйн хариуцлага хүлээлгэх эсэх эцсийн шийдвэрийг баталгаажуулах хүн нь Г.Занданшатар дарга.
Г.Эрхэс