Төрийн байгуулалтын байнгын хорооны өнөөдрийн хуралдаанаар Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийн төслийг хэлэлцэх эсэх асуудлыг хэлэлцлээ. Тодруулбал, УИХ-ын гишүүн Д.Оюунхорол нарын 10 гишүүний өргөн мэдүүлсэн уг хуулийн төсөлд Бурхан багшийн их дүйчин өдөр буюу зуны тэргүүн сарын 15-ны өдрийг нийтээр тэмдэглэх баяр болгож, бүх нийтээр амрах тухай тусгасан юм. Хэлэлцэж буй асуудалтай холбогдуулан УИХ-ын гишүүн Д.Лүндээжанцан “Бүх нийтээр амрах санал гаргасан амралтын өдрийн тоог шинээр нэмж байгаа хэрэг огтхон ч биш. Гаднын улс орнуудад шашны баярууд олон байна. Гэтэл Монголд яагаад ийм баяр болдоггүй вэ гэдэг асуудлыг сүсэгтэн олон тавьсан.  Олон улсад энэ өдрийн энх тайван, ёс суртахуун, энэрэл, түүх соёлоо дээдлэх баяр болгон тэмдэглэдэг. Би энэ өдрийг тэмдэглэх нь зөв гэж бодож байна. Намайг элдэвлэвэл элдэвлэнэ биз" гэлээ.

Төрийн байгуулалтын байнгын хорооны хуралдаанаар хуулийн төслийгш дэмжсэнээр энэ долоо хоногийн нэгдсэн чуулганаар хэлэлцэн батлах эсэхийг шийдэх юм.

Г.Алимаа