Илүүдэл жинтэй гэдэг шалтгаанаар “Оюутолгой” ХХК ажилд авахаас татгалзсанд гомдолтой байна гэж иргэн Ц.Чинбат энэ сарын 21-нээс эхлэн өлсгөлөн зарлаад байна. Тодруулбал тус компани нь 100 кг-аас дээш жинтэй хүнийг ажилд авахыг дотоод журмаараа хориглодог бөгөөд энэ ч үүднээс ажилд авахгүй гэсэн шийдвэрийг 2017 оны дөрөвдүгээр сард гаргажээ. Уг шийдвэрийг Хүний эрхийн үндэсний комиссоос хүний эрх зөрчсөн гэж үзсэн гэж үзсэн атал өнөөдрийг хүртэл иргэн Ц.Чинбатыг шалгаруулалтаар тэнцсэн ажлын байраар хангаагүй аж. Тиймээс тэрбээр “Оюутолгой” ХХК-ийн оффисын гадаа ийн өлсгөлөн зарлаад байна. Энэ талаар иргэн Ц.Чинбатаас тодрууллаа.

-Та тус компанид ямар ажилд орохоор сонгон шалгаруулалтад хамрагдсан юм бэ?

-Өнгөрсөн 2017 оны дөрөвдүгээр сард “Аюулгүй ажиллагааны зааварчилгааны сургагч” буюу оффисын ажилд орохоор өргөдөл гаргаж, таван шатны шалгалтад тэнцсэн. Нийт 97 хүн өрсөлдснөөс би нэгдүгээрт жагссан. Үүний дараа эрүүл мэндийн үзлэгт хамрагдсан. Эмчийн үзлэгээр цоо эрүүл гэж гарсан. Гэтэл 25 кг-ийн илүүдэл жинтэй байна гэж ажилд авахаас татгалзсан. Уг шийдвэрийг би хүлээж авахаас татгалзаж, ХЭҮК-т хандахад “Оюутолгой” ХХК-ийн шийдвэр нь хүний эрх зөрчсөн гэж үзсэн. Тиймээс Сүхбаатар дүүргийн Иргэний хэргийн анхан шатны шүүхэд хандсан. Шүүхээс 100 хувь миний талд шийдвэр гарсан. Гэтэл Улсын Дээд шүүхээс “Оюутолгой ХХК нь хөдөлмөрлөх эрхэнд саад учруулж, хөдөлмөрийн гэрээ байгуулахаас хууль бусаар татгалзсан байна” гэсэн шийдвэр гарсан. Шүүхийн энэ шийдвэрийг би огтхон ч ойлгохгүй байгаа. Иргэн, аж ахуйн нэгж хэрэг маргаанаа шийдүүлэх гэж шүүхэд ханддаг биз дээ. Гэтэл Улсын Дээд шүүхээс хоёр үзүүртэй зүү шиг шийдвэр гаргачихсан. Өөрөөр хэлбэл, намайг ажилд авах ёстой гээд ч байгаа юм уу тэр нь тодорхойгүй.

-2017 оноос хойш гэхээр хоёр жил өнгөрсөн байна. Ингэж асууж байгаад уучлаарай. Гэхдээ та жингээ хасаад дахиад шалгалт өгье гэж бодож үзсэн үү?

-“Оюутолгойд” шалгалт өгөөд тэнцээгүй, тэдний өмнөөс сөрж дуугарсан хүмүүс “хар” жагсаалтад бүртгэгддэг. Энэ утгаараа би дахин шалгалт өгөх эрхгүй.

-Таныг шүүхэд хандсанаас хойш “Оюутолгой” компанийн ажилчид холбогдсон уу?

-Хүний нөөцийн дарга нь холбогдсон. Ингэхдээ “Санаа зоволтгүй, ажилд авна” гэсэн и-мэйл бичсэн. Тэгсэн хэрнээ энэ үгэндээ хүрээгүй. Өлсгөлөн зарласнаас хойш хэн ч надтай уулзаагүй. Би оффисын үүдэнд майхан бариад сууж байна. Захирлууд нь өглөө ажилдаа ирээд орой тарахыг олон удаа харсан. Уулзах гээд асуухаар “Ирээгүй” гэж хүлээн авах нь хэлдэг.

-Та өлсгөлөн зарлаад гурав хонолоо. Таны биед муугаар нөлөөлөхөөс айхгүй байна уу?

-Эмнэлгийн байгууллагаас ирж үзээд 5.3 кг хассан, жаахан өөрчлөлт орсон байна гэж хэлсэн. Бие муудах вий гэхээс айхгүй байна. Учир нь “Оюутолгой” компанийн шалгалтыг давсан хэрнээ ажилд орж чадаагүй олон хүн бий. Хөдөлмөрлөх эрхээ зөрчүүлсэн атлаа дуугай суух нь шударга бус. Тиймээс энэ эрхээ хамгаалахын төлөө тэмцэж байна.

-Магадгүй таны тэмцэл үр дүнд хүрээд ажлын байраар хангагдлаа гэж бодоход эргээд танд ямар нэг дарамт, шахалт ирэх вий гэхээс та айхгүй байна уу?

-Би Монгол Улсын иргэн. Ажил хөдөлмөр эрхлэх эрхтэй. Хэрвээ би мэргэжлийн шалгуурт тэнцээгүй, эсвэл ямар нэг өвчнөөр хасагдсан бол гомдохгүй байсан. Гэтэл жингийн илүүдэл гэдгээр гадуурхсанд гомдож байна. Уг нь оффисын ажил шүү дээ. Уурхайн гүнд ажиллах байсан бол ойлгож болно. Хүлээн зөвшөөрнө. Тиймээс ажилд орлоо гэхэд ямар нэг байдлаар гадуурхвал эрхээ хамгаална.

-Компанийн удирдлагуудад та ямар шаардлага хүргүүлж байна вэ?

-Би мөнгө бус зөвхөн шударга ёсыг нэхсэн. Ингэхдээ нэгдүгээрт, надаас уучлалт гуйх. Хоёрдугаарт, шалгаруулалтад тэнцсэн ажлын байранд авах гэсэн шаардлагыг л тавьж байна.

-Та одоо ажил эрхлэж байгаа юу?

-Хүний эрхийн чиглэлээр ажиллаж байгаа. Гэхдээ тогтвортой ажлын байр биш л дээ.

“ОЮУТОЛГОЙ” ХХК: БИД ТАЙЛБАР ӨГӨХГҮЙ

-“Оюутолгой” ХХК-д жингийн илүүдэлтэй гэдэг шалтгаанаар орж чадаагүй гэх иргэн Ц.Чинбат ийм байр суурь илэрхийлсэн юм. Тиймээс энэ талаар тус компаниас тодруулахаар эрх бүхий албан тушаалтантай холбогдоход “Бид ямар нэгэн байр суурь илэрхийлэхгүй. Гурван шатны шүүхийн шийдвэр гарсан. Улсын Дээд шүүхэд иргэн Ц.Чинбат нь дөрвөн нэхэмжлэл гаргасан. Үүний гурван нэхэмжлэлийг нь шүүхээс хангахаас татгалзсан” гэсэн юм.

Г.Нацаг