Нийслэлийн удирдах ажилтнуудын энэ сарын 25-нд болсон шуурхай зөвлөгөөний үеэр сайжруулсан түлштэй холбоотой асуудлаар Нийслэлийн онцгой байдлын дарга, хурандаа Ж.Чүлтэмсүрэн "Нийслэлийн төвийн зургаан дүүргийн онцгой комисс 24 цагийн шуурхай штаб байгуулан түүхий нүүрсний тээвэрлэлт, хэрэглээнд хяналт тавин ажиллаж байна. Өнгөрсөн долоо хоногт 182 тонн түүхий нүүрс хураан авч мэргэжлийн хяналтын байгууллагад хүлээлгэн өгсөн" гэсэн юм.  Харин Хотын стандарт, орчны аюулгүй байдлын хяналт, зохицуулалтын газрын дарга С.Төмөрдулам "Монгол Улсад хүчин төгөлдөр мөрдөгдөж байгаа стандарт, норм дүрэм, түүний  хэрэгжилт нь газар дээрээ хэрхэн биелэгдэж байгаа талаар 2 төрлийн судалгааг хийсэн. Дээрх судалгаа болон үүрэг даалгаврын биелэлтийг үндэслэн дүгнэхэд стандарт, норм дүрмийн хэрэгжилт хангалтгүй байгаа нь төрийн байгууллагуудын уялдаа холбоо байхгүй, хяналт хариуцлагын тогтолцоо сул, төрийн албан хаагчдын стандартын талаарх мэдлэг ойлголт хангалтгүй, байгууллагын чиг үүрэгт нь стандартыг мөрдүүлэх талаар заасан байдаг боловч уг ажлыг зөвхөн мэргэжлийн хяналтын байгууллагын ажил гэж бодож байна. Цаашид төрийн байгууллагуудад чанарын удирдлагын тогтолцооны стандартыг нэвтрүүлэх, олон улсын жишигт нийцсэн стандарт, техникийн зохицуулалтын баримт бичгийг боловсруулах, төрийн байгууллагын албан хаагчдын мэдлэг ур чадварыг дээшлүүлэх шаардлагатай байна” гэв.

Зөвлөгөөний төгсгөлд Нийслэлийн Засаг дарга бөгөөд Улаанбаатар хотын Захирагч С.Амарсайхан сайжруулсан түлш худалдах цэгээс хол, өндөрлөг газарт байрладаг бага насны хүүхэдтэй өрх толгойлсон эмэгтэйчүүд, өндөр настан, хөгжлийн бэрхшээлтэй иргэдэд сайжруулсан түлшийг тээвэрлэн хүргэж ажиллах хэрэгтэй. Мөн амьдралын баталгаажих түвшингөөс доогуур орлоготой иргэдэд сайжруулсан түлшийг олгох ажлыг зохион байгуулах, ямар ажил зохион байгуулсан талаар эргэж мэдээллэх ёстой гэсэн ю. Мөн нийслэлийн 6 дүүргийн айл өрхүүдэд пийшин, зуух, яндангийн аюулгүй байдал, сайжруулсан түлшний зөв хэрэглээтэй холбоотой шаардлагатай зөвлөмж, мэдээ мэдээллийг энэ сарын 28-аас ирэх сарын 3-ний өдрүүдэд айл, өрх бүрээр биечлэн хүргэх ажлыг зохион байгуулж ажилла. Автобус, автомашин агаарын бохирдолд хэрхэн нөлөөлж байгаа талаар хяналт тавих, шаардлага хангахгүй тээврийн хэрэгслийг журамлах, сайжруулсан түлшний хэрэглээтэй холбоотой иргэдээс өгсөн дуудлагын дагуу түргэн шуурхай ажиллах боломжийг хангах зорилгоор “Таван толгой түлш” ХХК-ны дуудлага хүлээн авах 70119400 дугаарын утасыг Мэдээлэл, шуурхай удирдлагын төвийн 102 дуудлагын утсанд холбох ажлыг шуурхай зохион байгуулах” зэрэг үүрэг даалгаврыг холбогдох албан тушаалтнуудад өглөө.