Монголбанкны ерөнхийлөгч асан Н.Золжаргалд холбогдох хэргийн урьдчилсан хэлэлцүүлэг Чингэлтэй дүүргийн Эрүүгийн хэргийн анхан шатны шүүхэд хаалттай болж байна. Шүүх хуралд яллагдагчийн талаас шүүх хурлыг хойшлуулах хүсэлт гаргасан гэх бөгөөд үүнтэй холбогдуулан уг хүсэлтийг хэлэлцэж байна.

Хэргийг нэхэн сануулбал, нийслэлийн Прокурорын газраас Н.Золжаргалд яллах дүгнэлт үйлдэн Чингэлтэй дүүргийн Эрүүгийн хэргийн анхан шатны шүүхэд шилжүүлсэний дагуу энэ сарын 14-нд анхны урьдчилсан хэлэлцүүлэг болох байсан ч хойшлогдож, өнөөдөр болж буй нь энэ юм. 

Монголбанкны ерөнхийлөгчөөр ажиллаж байхдаа маш нууц тушаал гарган, арилжааны банкуудад их хэмжээгээр мөнгө шилжүүлсэн гэх үндэслэлээр эрүүгийн хэрэгт яллагдагчаар татсан. Тодруулбал, банкуудад тогтоосноос бага хүүтэйгээр зээл өгсөн, төрсөн ах Н.Жаргалсайхан болон түүний хүү, охины нэрээр 2013-2016 онд Австри улс руу мөнгө шилжүүлсан. Уг гуйвуулсан 650 мянган ам.долларыг эхнэр нь хүлээн авч, тус улсад 110 гаруй ам метр талбайтай байр худалдан авч, үндэслэлгүй хөрөнгөжсөн хэргээр шалгаж эхэлсэн юм. Энэ ч үүднээс шүүхийн урьдчилсан хэлэлцүүлгийг хаалттай хэлэлцэж байгаа аж.

Г.Эрдэнэ