Тагнуул болон цагдаагийн байгууллагаас өчигдөр шөнө гүйцэтгэх ажиллагаа явуулж дөрвөн байршлаас гадаадын 500-гаад иргэнийг цахим гэмт хэрэг үйлдсэн байж болзошгүй гэж үзэн саатуулсан билээ. Ингэхдээ “Юнион бюлдинг”, “Ориентал”, “Кентавр”, “Амар” зочид буудалд байрласан дээрх иргэд бүгдээрээ хятадууд байсан юм. Тэд Монголын хилээр орж ирсэн өдрөө эдгээр буудалд байрлажээ.

Энэ хугацаанд байрласан газраасаа гаралгүйгээр цахим гэмт хэрэг үйлдсэн байж болзошгүй хэмээн үзэж байгаа юм байна. Хятадын эдгээр иргэн нь 20-30 насны залуучууд бөгөөд бүгд Хонгконгоор дамжин Монголд ирснээс шалтгаалан хонгконгчууд байх магадлалтай гэсэн таамаг үүсээд байжээ.

Тагнуулын байгууллагаас өгсөн мэдээллээр эдгээр иргэдийг гар утас, компьютер ашиглан цахимаар санхүүгийн луйвар хийсэн байж болзошгүй гэж үзэж байгаа юм байна. Уг асуудалтай холбогдуулж, өнөөдрийн Засгийн газрын хуралдаанаар Тагнуулын ерөнхий газрын дарга Д.Гэрэл, Цагдаагийн ерөнхий газрын дарга С.Баатаржав нар Ерөнхий сайд болон танхимын гишүүдэд хаалттай мэдээлэл өгч байгаа аж. Өчигдрийн баривчилгааны хүрээнд саатуулсан иргэдийг хэрхэх талаар Засгийн газрын хуралдаанаас урьдчилсан байдлаар шийдвэр гаргана.

С.Сүлд