Сенсаацийг сенсаациар дарах технологи Монголд нэвтрээд хэдэн жилийг ардаа үдэв. Уг асуудал нь чухал, олон нийтийг хамарсан байж болох ч дараагийнхаар нь дарах жишээтэй. Ялангуяа сонгуулиар ажиглагддаг, өрсөлдөгчөө намнах, өөрийн хуудуутай асуудлыг мартуулдаг танил технологи. Ганцхан жишээ, товчхон өгүүлье. Жишээ нь, сайжруулсан шахмал түлштэй холбоотой иргэд угаартсан мэдээлэл хэсэг нийгмийг түгшээв. Сөрөг намын зүгээс ч энэ асуудлыг өлгөж аван тодорхой хугацаанд иргэдийн талд зогсож, сайжруулсан шахмал түлшийг буруутгалаа. Иргэдийн талд гэдэг нь сайжруулсан шахмал түлшнээс өөр шүүмжлэх сэдэвгүй болсон хэрэг.
Удалгүй Олон улсын Мөнгө угаах терроризмтэй тэмцэх санхүүгийн байгууллага болох ФАТФ-аас Монгол Улсыг “Саарал жагсаалт”-д оруулсан тухай албан ёсны шийдвэр гарсан нь өмнөхөө мартаж, удаахаар нь улстөржих сэдэв боллоо. “Өмнөхөө мартсан” гэдэг нь сайжруулсан шахмал түлштэй холбоотой асуудлыг хэлж байгаа юм. Угаас сайжруулсан шахмал түлшийг хэрхэн галлах, зуух, яндангаа хөөлөх зэрэг мэдээллийг шат дараатай өгч эхэлснээр угаартсан иргэдийн тоо мэдэгдэхүйц буурахын хэрээр шат шатандаа хариуцлагатай хандаж эхэллээ.
Сонирхолтой нь, “Саарал жагсаалт”-д орсон, оруулсан буруутныг хайх цаг дор манай тагнуул, цагдаагийн байгууллагын хамтарсан шалгалтаар нэр бүхий гурван зочид буудлаас 500 гаруй хятад иргэнийг саатуулсан нь сенсааци болж байна. Жуулчны визээр манай улсад орж ирсэн гэх 500-гаад хятад залуугийн баривчилгааны талаар одоогоор албан ёсны тайлбарыг аль нэг байгууллага хийгээгүй байна.
Ямар ч байсан Засгийн газрын өнөөдрийн хуралдаанд энэ талаар тагнуул, цагдаагийн байгууллагууд танилцуулга хийж байгаа юм. Холбогдох газраас албан ёсны мэдээлэл хийгээгүй ч 500 хятад иргэний баривчилгаатай холбоотой олон талын таамаглал, хардлага цахим орчинд өрнөж эхлээд байна. Эдгээрээс хамгийн бодитой нь жуулчны визээр манай улсад хөл тавьсан хятад залуус цахим казино ажиллуулж байсан байж магадгүй байгаа юм. 20 гаруй хоногийн өмнө Монголын хилээр орж ирсэн гэх дээрх иргэнтэй холбоотой мэдээллийн учиг удахгүй ил болох биз ээ.
Харин энэхүү баривчилгааны талаар Хууль зүйн сайд асан Х.Тэмүүжин “Баривчлах ажиллагаа явуулсан байх. Гүйцэтгэх ажил гэдэг нь нууц, мэдэгдэхгүй хийх ажиллгааг хэлдэг ухаантай. Бүгд сонсоод, үзээд, мэдээд хийгдэж байгаа ажлыг PR-тай баривчилгаа гэж хэлэх ёстой” хэмээн байр сууриа илэрхийлжээ. АН-ын Засгийн газрын үед Хууль зүйн салбарыг зангидаж байсан түүний тодотгосноор хүчний байгууллагаас хийсэн энэхүү баривчилгаа урьдчилан тооцоолсон төлөвлөгөөний дагуу хийсэн бололтой. Өөрөөр хэлбэл, тагнуул, цагдаагийн байгууллагаас хийсэн үйлдэл гүйцэтгэх гэхээсээ баривчилгаа байсныг Хуулийн сайд асан ийн тодотгожээ. Гагцхүү сүр дуулиантайгаар хийсэн энэхүү баривчилгаанаас ямар шийдэл, шийдвэр гаргах вэ гэдэг нь сонирхолтой сэдэв байх нь. Сенсаацийг сенсаациар дарах нь манайд тогтсон, тогтоож буй танил технологи учраас тэр шүү дээ?!
С.Сүлд
Сэтгэгдэл (24)