АН-ын Шинэчлэлийн хорооны тэргүүн П.Галиндэв мэдээлэл хийлээ. Тэрбээр намын дарга С.Эрдэнийг халз мэтгэлцээнд дуудаад байсан ч ирээгүй юм.
Энэ талаар "Намын дарга С.Эрдэнэтэй халз мэтгэлцэхээр 11.30 цагт товлосон. Гэвч намын дарга маань ирсэнгүй. Мэтгэлцэх үндэслэл нь сүүлийн үед гараад байгаа олон асуултад цаг тавих, хоёр талаасаа мэдээлэл өгье гэсэн. Ирэхгүй юм шиг байна. АН МАНАН мафийн нэг хэсэг болсон уу үгүй. С.Эрдэнэ гэдэг дарга маань барьцаалагдсан хүн мөн үү гэдэг асуудлаар хариулт авахыг зорьсон юм. Гуравдугаарт манай намын дарга нэг бол намаас хөөдөг, эсвэл цагдаад өгдөг боллоо. Өмнө нь энэ талаар хэлж байсан. Намын бланк бүхий албан бичигт 2019 оны есдүгээр сарын 17-нд С.Эрдэнэ даргын гарын үсэг бүхий бичиг байгаа юм. Би цагдаад шалгуулаад явах хүн үү, эсвэл С.Эрдэнэ дарга шалгуулаад явж байх хүн нь үү?. Үүгээр мэтгэлцье гэсэн юм. Төрөөс тендер авсан, хотын газрын хулгайлсан асуудлаар С.Эрдэнэ дарга цагдаад шалгуулах ёстой.
Мэтгэлцээнд дуудахаар ирэхгүй. Нам дээр очихоор хаалга үүд нь цоожтой. Уг нь уулзъя гээд олон удаа очиж байсан. Тийм учраас энэ асуудлыг яриад байгаа юм. АН-ын гаргасан мэдэгдэл байна. П.Галиндэв АН-ын гишүүн биш гээд. Намайг намын гишүүн биш эсэхийг С.Эрдэнэ ганц цаасаар нотлохгүй. Би 10 гаруй жилийн хугацаанд АН-ын гишүүнээр явж байна. Өнөөдрийг хүртэл хугацаанд хариуцлагатай албан тушаал хашиж ирлээ. Сонгинохайрхан дүүргийн АН-ын Хэрэг эрхлэх газрын даргыг олон жил хийсэн. Шат шатны сонгуульд гурван удаа нэр дэвшиж, Бүлгийн даргаар хүртэл ажилласан. Намын шинэчлэлд оролцсон. 2017 онд АН Үндсэн дүрмээ шинэчлэн боловсруулахад нарийн бичгийн даргаар ажилласан хүн. Тодорхой заалтыг оруулсан. С.Эрдэнийг дарга болохоос өмнө намын шинэчлэл хийгээд явж байсан. Түүнийг нь Дээд шүүхэд бүртгүүлэхдээ 22 заалтыг нь зассан байдаг, С.Эрдэнэ.
Гурвыг нь хэлье. Нэгдүгээрт, намын даргад хариуцлага тооцдог заалтыг байхгүй болгосон. Хоёрдугаарт, намын Үндсэн дүрмийн хорооны бие даасан байдлыг үгүй болгосон. Дарханы Д.Мягмардаш гээд рецедив, өөртэйгөө адилхан үл бүтэх нөхрийг тавьчихсан. Дүрэм, журамгүй нам болгосон. Гуравдугаарт, Дотоод сонгуулийн хороог өөрчилж, сонгуулийг будлиулсан. Үүгээр нь ярилцъя гэхээр ирэхгүй, алга болж байна.
Өнгөрсөн хугацаанд АН-ын Шинэчлэлийн хөдөлгөөнөөс тэмцлээ. Ямар ч сайхан дүрэм бичиж өгөөд бохирдсон улстөрчид мөрдөхгүй юм байна. Дүрэмдээ биш хүндээ байна. Юу ч хийхээс буцахгүй болчихсон улстөрчдийг зайлуулахгүйгээр шинэчлэл явахгүй юм байна. С.Эрдэнийг АН-аас, төрөөс зайлуулж байж шинэчлэл ирнэ.
С.Эрдэнийн талаар ярих юм их байна. Өөрөө ирээгүй учраас заримыг нь яръя. 1996-2000 онд энэ хүн Баянголын Засаг дарга хийжээ. Өнөөдөр хотоор дүүрэн газартай болсон. Өргөө хавийн газар хувийн байшингаар дүүрлээ. Төрд ойртох бүртээ энэ намыг ашиглаж ирсэн байна. 2004-2008 онд Нийгмийн даатгалын газрын даргаар ажилласан. Маш олон мөнгө төгрөг идсэн хэргээр 2009 онд шүүхээс зургаан жилийн хорих ял авч байсан. 2009 оны тавдугаар сард Ц.Элбэгдорж Ерөнхийлөгчөөр сонгогдсоны дараа С.Эрдэнийн хэрэг хэрэгсэхгүй болсон. Тийм учраас барьцаалагдсан улстөрч гээд байгаа юм. Ц.Элбэгдоржийн барьцаанд байдаг хүн. Ийм хүнээр АН удирдлуулаад хаана хүрэх вэ. С.Эрдэнийг цэвэрлэж байж АН шинэчлэгдэнэ. Ардын намд ч байгаа байх. Уг нь олон баримт авчирсан. Эзэн нь байхгүй учраас олон юм яриад хэрэггүй байх. Энэ байдлаар С.Эрдэнэ АН-ыг гарцаагүй ялагдалд хүргэх нь. Өөрөө ганцаараа гишүүн болох л байх” гэлээ.
С.Сүлд
Сэтгэгдэл (21)