Үндсэн хуулийн Цэцийн уржигдрын хуралдаанаар Ашигт малтмалын тухай хуулийн зарим заалтыг хүчингүй болгосон. Ингэснээр ашигт малтмалын нөөц ашигласны төлбөрийг хэн төлөх тухай хуулийн зохицуулалтгүй болоод байгаа. Улмаар улсын төсөв тасрах, өргөн бариад хэлэлцүүлж байгаа ирэх оны Төсвийн тухай хуулийн төсөлд томоохон өөрчлөлт орох нөхцөл үүссэн. Үндсэн хуулийн Цэцийн энэхүү шийдвэрийн үр дагавар хамгийн энгийнээр ингэж илэрч байгаа. Гэхдээ Цэцийн дээрх шийдвэрийг залруулахаар Засгийн газар, тэр тусмаа Сангийн яам шуурхай ажиллаж эхэлжээ. Өчигдөр Сангийн сайд Ч.Хүрэлбаатар Ашигт малтмалын тухай хуульд нэмэлт өөрчлөлт оруулах хуулийн төсөлд санал авах хүсэлтээ Хууль зүй, дотоод хэргийн сайд Ц.Нямдорж, Уул уурхай хүнд үйлдвэрийн сайд Д.Сумъяабазар нарт хүргүүлжээ. Тус яамдаас ирсэн саналыг тусгаад хуулийн төслийг УИХ-д өргөн барих ажээ. Уг төслийг УИХ-ын чуулганы хуралдааны дэгийн тухай хуулийн нэн яаралтай горимоор хэлэлцүүлэхээр төлөвлөсөн юм байна. Учир нь, Ашигт малтмалын нөөц ашигласны төлбөр (АМНАТ)-өөр улсын төсөвт дунджаар 1.3 их наяд төгрөгийг төвлөрүүлдэг. Одоо хэлэлцүүлгийн шатанд байгаа ирэх оны Төсвийн тухай хуульд ч энэхүү орлогыг тусгасан байгаа. Энэ сарын 15-ны дотор батлах ёстой Төсвийн тухай хуулийн хэлэлцүүлгийг үргэлжлүүлэхээс өмнө Ашигт малтмалын тухай хуульд нэмэлт, өөрчлөлт оруулж байж роялти буюу АМНАТ-ийг төсөвт төвлөрүүлэх боломжтой болох юм.

Б.Жаргал