Шударга өрсөлдөөн хэрэглэгчийн төлөө газраас 2019 оны III улирлын байдлаар иргэдээс ирсэн гомдол мэдээллийн талаар хийсэн хяналт, шалгалтаар мэдээлэл хийлээ.
Сүүлийн гурван жилийн хугацаанд буюу 2017, 2018, 2019 онуудад иргэд, хэрэглэгчдээс гаргасан гомдлын үзүүлэлт нэмэгджээ. Тухайлбал, 2017 онд иргэд, хэрэглэгчдээс 1850 гомдлыг хүлээн авч шийдвэрлэж байсан бол 2018 онд 2593, 2019 оны арваннэгдүгээр сарын байдлаар 2780 өргөдөл, гомдлыг хүлээн авсан байна. Ирж байгаа гомдлын дийлэнх нь барилга, орон сууц, худалдаа үйлчилгээ, ахуйн үйлчилгээ, харилцаа холбооны салбарт гарч буй гомдол эзэлж байгаа аж.
Энэ талаар ШӨХТГ-ын Хэрэглэгчийн эрхийг хамгаалах газрын дарга Ш.Цэрэндулам “Иргэд, хэрэглэгчдээс дулаан, цахилгаан, СӨХ, контурын үйл ажиллагаанд гомдож байгаа нийтлэг гомдол, маргаан байна. Энэ хүрээнд ШӨХТГ-аас эрчимтэй арга хэмжээ зохион байгуулж ажилласан. Мөн харилцаа холбоо болон боловсролын салбар дахь гомдол өсөх хандлагатай байна. Түүнчлэн аялал жуулчлалын салбар дахь гомдол тухайлбал, “Ориг Трэйвэл” ХХК, “Блью Тур” ХХК-тай холбоотой гомдол ирсэн.
Үүнтэй холбогдуулан хийсэн хяналт шалгалтаар гэрээгээ зохих ёсоор хийдэггүй зэрэг алдаа дутагдал илэрлээ. “Ориг Трэйвэл” ХХК-ны Турк улсад хийсэн аялалд Зөрчлийн хэрэг нээж , хэрэглэгчийг үнэн бодитой мэдээллээр хангаагүй, холбогдох хэрэглэгчийн эрхийг хамгаалах зохион байгуулаагүй гэдэг үнэслэлээр таван сая төгрөгөөр торгосон. Мөн “Блью Тур”, “Масс Тур” компаниудын хувьд Улан-Үдэ-Итгэлт хамба, Улаанбаатар-Эрээн зэрэг чиглэлд бизнес болон аялалын шинжтэй аялал зохион байгуулж байх үед иргэд, хэрэглэгчдээс ирүүлсэн гомдолтой холбогдуулан үйл ажиллагааг нь хянаж, шалгасан. Хяналт, шалгалтаар тухайн ААН, байгууллагуудын үүрэг, хариуцлага, мэдлэг, хандлага, ойлголт зэрэг дутмаг байгаагаас гадна салбар хариуцаж байгаа яам, зөвшөөрөл олгож байгаа аялал жуулчлалын холбоо зэрэг байгууллагуудын үүрэг хариуцлага сул, хоорондын уялдаа холбоо байхгүйгээс ийм боломж бололцоог олгосон байна гэж үзсэн. Тиймээс БОАЖЯ-д холбогдох зөвлөмж хүргүүлэн ажиллаж байна. Түүнчлэн гадаадад жуулчин илгээх үйл ажиллагаа эрхлэх ямар нэгэн ангиллын гэрчилгээгүй мөртлөө аялал жуулчлал зохион байгуулж байна” гэв.
Мөн олон нийтийн баяр, тэмдэглэлт өдрүүдийг угтан хямдралтай худалдаа, үйлчилгээ явуулдаг байгууллагуудад Шударга өрсөлдөөн хэрэглэгчийн төлөө газраас зөвлөмж хүргүүлсэн байна. "Хямдралтай худалдаа" гэх залилангийн үйлдлээр иргэдийг хохироох явдал өнгөрөгч жилүүдэд их гарч байсан учраас ийм зөвлөмж хүргүүлэхээс аргагүй болсон байна.
Ийм залилангаар иргэдийг хохироосон нь тогтоогдсон байгууллага аж, ахуйн нэгжийг таван сая төгрөгийн торгууль ногдуулдаг гэдгийг ШӨХТГ-аас мэдээлэв.
Зөвлөмжид бизнес эрхлэгч аж ахуйн нэгж, байгууллагыг "Хэрэглэгчийн эрхийг хамгаалах тухай хууль", "Зар сурталчилгааны тухай хууль"-д заасан заалтуудыг хэрэгжүүлж ажиллахыг анхаарууллаа. Хэрэглэгч барааны талаар үнэн зөв, сонголт хийхэд туслах бодит мэдээллээр хангагдах эрхтэй бөгөөд үйлдвэрлэгч, худалдагч , гүйцэтгэгчээс хэрэглэгчид бараа, ажил, үйлчилгээтэй холбоотой худал мэдээлэл өгөхийг хориглодог аж.
Бараа ажил үйлчилгээгээ борлуулахдаа залилан мэхлэх, худлаа шошго хадан төөрөгдүүлэх, эсвэл хүч хэрэглэх замаар худалдах, гүйцэтгэх, хэрэглэгчийн эрхийг хохироохыг хориглож байгаа юм. "Зарагдсан барааг буцаахгүй" гэдэг ч хүч хэрэглэсэн тохиолдол мөн аж.
Аж ахуйн нэгж, байгууллга нь хангалттай тодорхой мэдээллийг орхигдуулан эсхүл мэдлэг туршлага дутмаг буюу итгэмтгий байдлыг нь ашиглан хэрэглэгчийг төөрөгдөлд оруулахын хуулиар ийнхүү хориглодгийг иргэд мэдэж байх учиртай юм.
