УИХ дахь МАН-ын бүлэг ээлжит хуралдаанаа хийж хэд хэдэн асуудал хэлэлцжээ. Ингэхдээ Сонгуулийн тухай хуулийг голчлон хэлэлцсэн талаар ажлын хэсгийн ахлагч Л.Энх-Амгалан хэлсэн юм.

Тэрбээр “Хуулийн төслийн хүрээнд Ажлын хэсэг хоёр жил ажиллаж байна. Ерөнхийлөгч, УИХ, орон нутгийн сонгуулийг 2015 онд нэгтгэснээр 2016 оноос хэрэгжүүлсэн. Үр дүнд гурван өөр онцлогтой сонгуулийг нэг хуулиар зохицуулах боломжгүй гэдэг нь амьдрал дээр гарсан. Тиймээс гурван сонгууль тусдаа байх ёстой гэсэн тогтолцоог хадгалж, Үндсэн хуульд өөрчлөлт оруулсан. Хууль тогтоомжийн тухай хуулиар хууль өргөн барихын өмнө хэлэлцүүлэг хийж, нээлттэй тавьж, ард иргэдийн саналыг авдаг.

2018 онд 26 улс төрийн намын төлөөлөл, төрийн бус байгууллагуудтай нээлттэй хэлэлцүүлэг хийж, гурван хууль дээр 320 гаруй санал ирүүлсэн. Тухайлбал, сонгууль зохион байгуулалт, тогтолцоо, цахим зохицуулалт, сонгуулийн маргаан, сурталчилгаа зэрэг гол гол зарчмын саналууд ирсэн. Мөн мөнгөнөөс хамааралтай сонгуулиудыг болих, хуулийн заалтаар хаах зохицуулалт хийсэн. Тогтолцооны хувьд 50+26 гэснийг хуульд тусгаж байгаа.  Шууд сонгоно гэдэг нь мажоратор тогтолцоо. Үүнд аймаг нэг тойрог, улс нэг тойрог, жижиг 76, том жижиг мажоритор буюу 50+26 гэсэн хувилбарууд бий. 50 гишүүн нь тойрогт нэр дэвших бол улс төрийн намууд 26 нэр дэвшигчийг улс даяар нэр дэвшинэ. Сонгогч улс нэг тойрогт орж ирсэн 26 нэр дэвшигчээс нэг хүн, тойргийн нэг хүн гэж хоёр хүн сонгоно. Өмнө нь бид нам дугуйлдаг байсан бол энэ удаад нэр дэвшигчийг сонгож, хамгийн олон ард түмнээс санал авсан хүнийг эрэмбэлэнэ" гэсэн юм.

Мөн тэрбээр “Фэйсбүүк хэрэглээгээр Монгол Улс Азид нэг, дэлхийд 10-т ордог. Фэйсбүүк компанийн зүгээс сонгуулийн шударга хийх нь улс орны тогтолцооны асуудал гэж үзээд хүндэтгэх зарчмаар бүтцийн өөрчлөлт хийж байгаа юм билээ. Фэйсбүүк компанийн төлөөлөл Монголд ирж, сонгуулиар аль болох фэйсбүүк орчноос үл шалтгаалах, сонгогчдод нөлөөлөх нөлөөллийг багасгах чиглэлээр хамтарч ажиллаж байна. Шинэ хуульд нэргүй хаягаас санаатайгаар зохион байгуулж байгаа асуудалд хязгаарлалт хийнэ. Гэхдээ фэйсбүүкийг бүрэн хаахгүй, тодорхой хязгаарлалт хийх заалт бий. Өөрийн нүүр хуудас болон албан ёсны хаягтай байх шаардлагатай” гэлээ.

С.Сүлд