Нийслэлийн Газар зохион байгуулалтын алба, Мэргэжлийн хяналтын газар, Олон улсын худалдаа логистикийн төвөөс өнгөрсөн наймдугаар сарын 20-22-ны өдрүүдэд төвийн зургаан дүүрэгт зөвшөөрөлгүй автомашины худалдаа эрхэлж байсан 62 аж ахуй нэгжид шалгалт хийсэн талаар мэдээлэл хийлээ.

Энэ талаар НМХГ-ын Байгаль орчин, геологи, уул уурхайн хяналтын хэлтсийн дарга Ж.Ганзориг “Хяналт шалгалтаар зөрчилтэй гарсан 62 аж ахуй нэгжид хугацаатай мэдэгдэл хүргүүлэхэд 45 аж ахуйн нэгж зөрчлөө арилгаагүй. Өөрийн өмчилсөн газар дээрээ автомашин зөвшөөрөлгүй борлуулж байсан Баянзүрх дүүргийн 31 иргэн, 15 ААН-ийн газрыг хүчингүй болгох тухай саналаа Газрын тухай хуулийн бусад заалтын дагуу нийслэлийн Засаг даргад хүргүүлсэн. Өнөөдрийн байдлаар хоёр иргэн, гурван ААН-ийн газрыг хүчингүй болгож, албадан чөлөөлж байна. Цаашид зөвшөөрөлгүй үйл ажиллагаа явуулсан аж ахуйн нэгжид хариуцлага тооцож, газрыг нь хүчингүй болгуулна” гэлээ. Харин “Олон улсын худалдаа логистикийн төв” ХК-ийн гүйцэтгэх захирал К.Олимпиад “Авто худалдааны цогцолбор 2014 онд 20 тэрбумын хөрөнгө оруулалтаар байгуулагдсан. 2016 оноос хойш тогтмол үйл ажиллагаа явуулж эхэлсэн бөгөөд одоогоор 6375 автомашины зогсоолой болсон. Өнөөдрийн  байдлаар 3600 орчим автомашин байна. Нэг автомашины түрээсийн зогсоол өдрийн 2000 төгрөг байдаг. Сул зогсоол олон байгаа учир нийслэлийн нутаг дэвсгэр дээр худалдаа эрхлэж байгаа аж ахуйн нэгжүүд тус газарт үйл ажиллагаа явуулах бүрэн боломж бий. Нэгэнт хөрөнгө гаргаад байгуулсан авто худалдааны төвийг бүрэн чадлаар нь ашиглах ёстой” гэв.