“Шударга таван гишүүн” болтлоо нийгмийн ой тоонд суусан таван гишүүн энэ парламентад бий. Тэдгээр нь Л.Оюун-Эрдэнэ, Т.Аюурсайхан, Х.Нямбаатар, Ж.Батзандан, Л.Болд нар. Монголын улс төрд, нийгэмд бий болсон МАНАН дэглэмийг нураахын эсрэг тэд тэмцсэн. Эхний ээлжид УИХ-ын дарга асан М.Энхболдыг албан тушаалаас нь буулгахын төлөө жагсаал зохион байгуулсан, тэр нь үр дүнд хүрсэн. Түүнээс хойш тэдний тэмцэл ажин түжин байдалд шилжсэн ч Л.Оюун-Эрдэнэ Засгийн газрын Хэрэг эрхлэх газрын дарга, Т.Аюурсайхан Аюулгүй байдал, бодлогын байнгын хорооны, Х.Нямбаатар Хууль зүйн байнгын хорооны дарга, Ж.Батзандан, Л.Болд нар АН-аас өрх тусгаарлаж ШИНЭ намыг байгуулсныг эс тооцвол тэдний тодотгож байснаар МАНАН хэмээх эзэн бие, нэр холбогдогчтой бүлэглэл арилсангүй.

Эсрэгээрээ “Шударга таван гишүүн”-ий үйл ажиллагаа, тэмцэл зогсонги байдалд шилжив. Сонирхолтой бас хачирхалтай гэмээр нэгэн үйл явдал улс төрд өрнөж эхэлсэн нь тухайн үеийн тэмцэгч гишүүд, иргэдийн хамт УИХ-ын дарга асан М.Энхболдтой уулзахаар өрөөнд нь орох үеэр жагсагчдын нэгийг хутгатай оруулсан нь шуугиан дэгдээх шалтгаан болов. Улмаар тухайн үед УИХ-ын даргаар ажиллаж байсан М.Энхболд руу хутга барин дайрсан тухай мэдээлэл шинэ оны босгон дээрх дуулианы нэгж болж байна.

Тэгвэл уг асуудлаар “Босоо хөх Монгол” ТББ-ын тэргүүн Г.Ганхуяг өдөр тутмын Өдрийн сонинд тайлбар өгчээ. “УИХ-ын даргын өрөөний үүдэн дээр Д.Дашийн халааснаас тактикал тонгоргийг хурааж авсан” хэмээх гарчиг бүхий түүний ярилцлагад “Жагсаалд оролцсон иргэний хөдөлгөөнүүдийн тэргүүн таван хүн, зохион байгуулсан таван гишүүний хамт УИХ-ын даргын өрөөнд орсон.

Би “Босоо хөх Монгол” ТББ-аа төлөөлж орсон. Бусад хүн ямар байгууллагаас төлөөлж орсныг сайн мэдэхгүй юм. Бидний дунд “Дархан Монгол ногоон нэгдэл” ТББ-ын Д.Даш байсан. Д.Даш тэр жагсаал цуглаан дээр их л идэвхтэй явсан байсан.

Гэр бариад жагсах, суулт хийхэд ч байсан. Ингээд Төрийн ордны гадна хашаагаар бүгд бичиг баримтаа шалгуулж орцгоосон. Төрийн ордны зүүн талын хаалгаар орохдоо скайнераар шалгуулж, бичиг баримтаа ч давхар шалгуулж бүртгүүлээд цаанаа очиж нэгжүүлсэн.

УИХ-ын даргын өрөөний үүдэнд очоод дахиад нэгжүүлэхэд Д.Дашийн халааснаас байлдааны тактикал эвхдэг хутга гарч ирсэн түүнийг би нүдээрээ харж байсан. УИХ-ын даргын өрөөнд ороод яг уулзалт хийж байхад Д.Даш УИХ-ын дарга руу дайрсан. “Ална п... минь” гэчихсэн дайрч байсан. Би тухайн үед бодсон. Хэрэв Д.Даш хутгатай орж таараад хутгаа гаргаад ирсэн бол яах вэ.

Хутгаа гаргаж ирээд тэр хүнд гэмтэл учруулсан бол яах вэ. Тэгсэн бол ард түмний нэгдсэн жагсаал нурах байсан. Бид нар бүгдэд нь хүч хэрэглэж, хэлмэгдэх ажиллагаа явагдах байсан. Яаж харин үүдэнд шалгаад хутгыг нь хураасан юм.

Зэвсэггүй дайрах үед Төрийн тусгай хамгаалалтын албаны залуус ганц эвхээд аваад гараад явчихаж байна лээ. Тийм зүйл болсон, болсон. Тэр байдлыг нүдээрээ харсан гэрч нь би мөн” гэжээ.

Эндээс хэд хэдэн асуулт гарч ирж байна. Тэр нь Төрийн нэгдүгээр зэргийн хамгаалалттай хүний өрөөнд яагаад хутга нэвтрүүлэхийг завдав. Хоёрдугаарт, иргэдэд үйлчилгээ үзүүлж байгаа албан байгууллагуудаас хамгаалалт хамгийн өндөртэй Төрийн ордонд яагаад хутга нэвтрүүлэв. Үүдний скайнерт байлдааны зориулалттай тактикал эвхдэг хутга яагаад илэрсэнгүй гэх зэргээр. Үнэхээр үүдний скайнерт эвхдэг хутга илрээгүй бол энэ нь өөрөө асуудал. Тэгээд ч Төрийн номер нэг хамгаалалтыг хангах учиртай Төрийн ордны шалган нэвтрүүлэх хэсгээр нийгмийн уур амьсгал таагүй байх үед хутгатай хүнийг анзаарахгүй оруулсан нь өөрөө асуудал, эргэлзээ дагуулах нь тодорхой. Энгийн нэгэн Төрийн ордон руу нэвтрэх гэж бичиг баримтаа шалгуулахаас эхлээд өмсөж байгаа хувцсаа хүртэл цензурдах нь энүүхэнд. Гагцхүү нийгмийн уур амьсгал бухимдалтай байх үед УИХ-ын даргын өрөө рүү хутгатай хүнийг нэвтрүүлэх гэж оролдсоны ард хэн нэгний нөлөө байсан эсэх нь өөрийн эрхгүй хардлага төрүүлж байна. Харин тэр гишүүн нь хэн бэ гэсэн асуулт энэ өдрүүдэд хөврөх нь?! 

Г.Эрхэс