УИХ-ын чуулганаар Сонгуулийн тухай хуулийн төслийг хэлэлцэх энэ цаг үед МАХН-ын дарга Н.Энхбаяр, хүний эрхийн хуульч Ц.Оюунбаатарын хамт Төрийн ордонд орж ирж Төрийн байгуулалтын байнгын хорооны дарга С.Бямбацогт, Сонгуулийн багц хуулийн ажлын хэсгийн ахлагч Д.Тогтохсүрэн нартай уулзсан юм. Учир нь Төрийн байгуулалтын байнгын хорооны энэ сарын 17-ны өдрийн хуралдаанаар УИХ-ын сонгуулийн хуулийн төслийн анхны хэлэлцүүлгийг хийх үеэр О.Баасанхүү нарын гишүүд “Шүүхээр авлига, албан тушаалын хэргээр ял эдэлж байсан хүмүүс нэр дэвшихийг хориглох” гэсэн зарчмын зөрүүтэй санал гаргаж байнгын хороогоор дэмжсэнээр чуулганы нэгдсэн хуралдаанаар хэлэлцэхээр болсон. Тэгвэл өнөөдрийн чуулганы хуралдаанаар уг санал мөн дэмжигдсэн. Хуулийн уг заалттай холбогдуулан МАХН-ын дарга Н.Энхбаяр сонгох, сонгогдох эрхээ ийн нэхсэн юм. 

Өөрөөр хэлбэл, Сонгуулийн тухай хуульд “Шүүхээр авлига, албан тушаалын хэргээр ял эдэлж байсан хүмүүс нэр дэвшихийг хориглох” гэсэн заалт тусгагдвал МАХН-ын дарга Н.Энхбаяр сонгуульд өрсөлдөх боломжгүй болох аж. Тиймээс Төрийн байгуулалтын байнгын хорооны дарга С.Бямбацогт, Ажлын хэсгийн ахлагч Д.Тогтохсүрэн нартай уулзаж, байр сууриа илэрхийлсэн байна. Ажлын хэсгийн ахлагч Д.Тогтохсүрэн “Энэ асуудал бүлгээр огт яригдаагүй. Ер нь бол өргөн барьсан хуулийн төсөлд ч тийм байгаа. Ажлын хэсэгт ч тийм байсан. Ялаа эдлээд дууссан, ялгүйд тооцогдсон бол тэр хүнийг дахиж ялтайд тооцох юм уу, эрхийг нь зөрчиж, нэр дэвшүүлэх эрхийг нь хааж болохгүй” гэсэн байр суурьтай байгаа.

Хүн тухайн үед гэмт хэрэгт холбогдож ял авсан бол түүнийгээ эдлээд дууссан бол насан туршдаа эрхээ хаалгаж болохгүй. Анх хуулийн төслийг ийм байдлаар өргөн барьсан. Ажлын хэсэг ч ингэж үзсэн. Төрийн байгуулалтын байнгын хорооны өчигдрийн хуралдаан дээр манай зарим гишүүн зарчмын зөрүүтэй санал хураалгаж дэмжигдсэн зүйлүүд бий. Одоо чуулганаар ярих байх” гэв.