АН-ын дарга С.Эрдэнэ 2020 оны УИХ-ын ээлжит сонгуульд намаасаа нэр дэвших хүсэлтэй гишүүдийг 100 сая төгрөг төлөх шийдвэр гаргасан билээ. Тэгвэл уг шийдвэрийг намын гишүүд нь эсэргүүцэж дараах шаардлага гаргасан байна. Ардчилсан намын Шинэчлэлийн хөдөлгөөнөөс гаргасан уг мэдэгдэлд “Ардчилсан намыг Үндэсний бодлогын хорооны гишүүдэд уриалга гаргасан байна. Үүнд, 2020 оны УИХ-ын сонгуульд нэр дэвших хүсэлт илэрхийлэхийн тулд 100 сая төгрөг намд төлөх шийдвэрийг С.Эрдэнэ санаачлан Үндэсний Бодлогын хороогоор тулган батлуулсан. Энэхүү шийдвэр нь ардчилал, хүний эрхийг зөрчсөн төдийгүй улс төрийн намд одоо ч цаашид ч байж болохгүй буруу жишиг гэж үзэж байна.

“100 саяын хэрэг” Үндсэн хуулийн 14 дүгээр зүйлийн 2 болон Улс төрийн намын тухай хуулийн 5.1.3 дахь заалтыг зөрчсөн шийдвэр болохыг анхааруулж байна.

“100 саяын хэрэг” нь АН-ын шинээр баталсан үзэл баримтлалын хувь хүний эрх чөлөө гэсэн хэсгийг бүдүүлгээр зөрчиж байна.

“100 саяын хэрэг” нь төрийн өндөр албан тушаалыг үнэлэн зарж, төрийн эрхийг хууль бусаар авах гэсэн МАН-ын 60 тэрбумын схемтэй яг адил үйлдэл гэж үзэн эсэргүүцэж байна.

Иймд олон хууль тогтоомж зөрчсөн Ардчиллын үнэт зүйлийг уландаа гишгэсэн буруу шийдвэрээ татан авч, яаралтай хүчингүй болгохыг С.Эрдэнэ болон ҮАХ-ны гишүүдээс шаардаж байна” гэжээ.