УИХ-ын өнөөдрийн чуулганаар Эрүүгийн багц хуульд нэмэлт, өөрчлөлт оруулах хуулийн төслийг хэлэлцэж байна. Энэ үеэр УИХ-ын гишүүд санал хэлж байна.

О.Баасанхүү: Мөрийтэй тоглоомыг Эрүүгийн хуульд оруулсан маш зөв. Аливаа донтолтыг хуулиар тэр дундаа төрийн хатуу дэглэмээр барих ёстой. Тэгж байж зогсооно. Гэхдээ олон нийтийн газар гэдгийг баар сав, зах, дэлгүүр гэж ойлгож байна. Эсвэл мэдээлэл технологи гэхээр цахим юм шиг байна. Гэтэл хувийн эзэмшилдээ бол яах бэ. Хувийн  компани, эсвэл гэртээ байвал яах вэ. Ойлгомжгүй байна.

Мөн үр дүнг нь урьдчилан төсөөлөх боломжгүй, аз туршиж тоглодог гэхээр сугалаа орно биз дээ. Е-баримт орно. Дээр нь УИХ-ын гишүүд тойрогтоо баахан сугалаа явуулдаг биз дээ. Хуулиар хориглосон гэхээр тусдаа хууль батлах юм уу.

Х.Нямбаатар: Мөрийтэй тоглоомыг хуучин Эрүүгийн хуулиар эрүүгийн хариуцлага хүлээлгэдэг байсан. Гэтэл шинэ хуулиар эрүүгийн хэргээс хасагдсан. Үүний улмаас олон мөрийтэй тоглоомын газар нээгдсэн. Зохион байгуулсан, орон байраар хангасан тохиолдолд эрүүгийн хариуцлага хүлээлгэнэ. Хуулиар хориглосон мөрийтэй тоглоомонд эрүүгийн хариуцлага хүлээлгэж, тав хүртэлх жилийн ял оногдуулна.

Ингээд санал хураалт явуулахад гишүүдийн 51 хувь нь дэмжсэнээр мөрийтэй тоглоомын газар зохион байгуулах, орон байр хангавал эрүүгийн хариуцлага хүлээлгэхээр боллоо.