АНУ-ын Ерөнхийлөгч Дональд Трамптай холбоотой асуудлаар Конгрессын доод танхим тус улсын Ерөнхийлөгчийн импичментийг зарлах хүрээнд түүнийг буруутгасан үндэслэлүүдийг хэлэлцээд, санал хурааж, дэмжив. Ингэснээр Ерөнхийлөгч Дональд Трампийг албан тушаалаас нь огцруулах эсэх асуудал Сенатын танхимд үлдэж байна. Энэ талаар Ерөнхийлөгч Трамп Сенатад импичментийн асуудлаарх ажиллагааг яаралтай эхлүүлэхийг хүсч буйгаа мэдэгджээ.

Тэрбээр Ардчилсан намынхан хуульч, гэрчгүйгээр Төлөөлөгчдийн танхимд санал хураалт явууллаа. Одоо тэд ажиллагааг хэрхэн явуулахыг Сенатад заахыг хүсч байна. Тэдэнд ямар ч нотлох баримт байхгүй. Тийм баримт үзүүлэх ч үгүй. Ардчилсан нам ард нь хоцрохыг хүсч байна. Ажиллагааг яаралтай эхлүүлэхийг хүсч байна!" хэмээн мэдэгдэл хийжээ.

Үүнтэй агаар нэг байдал Монголын улс төрд бий болсон нь иргэдийн өрийг тэглэх Ерөнхийлөгч Х.Баттулгын амлалт. Тэрбээр 2018 оны хоёрдугаар сарын 4-нд Дундговь аймгийн иргэдтэй уулзах үеэрээ “Та бүхэн өр зээл дарах асуудлыг сонирхож байна. Сонгуулийн үеэр АН хэрвээ намайг сонгогдох юм бол ард түмний өрийг тэглэх талаар анхаарч, санаачилгатай ажиллаарай гэдэг үүрэг өгсөн. Энэ үүргийг би мартаагүй, биелүүлнэ. Миний тооцоолж байснаар оффшор бүст байгаа хөрөнгийг АТГ, прокурортой хамтраад оруулж ирэх. Хоёрдугаарт, өдөр, шөнөгүй урд хөрш рүү байгалийн баялгаа гаргаж байгаа ч мөнгө нь орж ирэхгүй байгаад анхаарч, орлого нэмэгдүүлэх. Гуравдугаарт, газрын доорх баялаг ард түмнийх. Энэ баялгийг Үндсэн хуульд заасны дагуу иргэддээ хуваарилаад ирвэл өр, зээлээсээ гарах бүрэн боломжтой. Энэ талын хуулийн төслийг өргөн барихаар АН-ын УИХ-ын гишүүд ажиллаж байгаа. Удахгүй УИХ-д өргөн барина” гэсэн байдаг. Гэвч түүнээс хойш нэг жилийн хугацаа өнгөрсөн ч өнөөдрийг хүртэл хугацаанд иргэдийн өр, зээлтэй холбоотой хуулийн төсөл парламентад өргөн баригдсангүй.

АН-ын дарга С.Эрдэнэ намын залуу гишүүдтэйгээ толхилцоон үүсгэснийг эс тооцвол тухайн намаас ч, Ерөнхийлөгчийн зүгээс ч хуулийн төсөл өргөн барьсангүй. Эндээс нэг асуулт гарч ирнэ. Тэр нь Сонгуулийн хуулиа, цаашлаад Ерөнхийлөгчийн сонгуулийн хуулийг батлах бүрэн эрхтэй эрх баригч МАН-ын зүгээс 2020 онд тав дахь Төрийн тэргүүн Х.Баттулгад ямар амлалтыг нь нэхэн сануулах вэ?. Хамгийн нэгдүгээрт иргэдийн өрийг тэглэх асуудал хөндөгдөх нь лав. Харин тэр үед Ерөнхийлөгч Х.Баттулгын хуулийн төсөл бэлэн болох уу гэдэг нь өөрөө эргэлзээтэй асуудал юм.

Ямар ч байсан АН-ын дарга С.Эрдэнэ УИХ-д сонгогдсон нийт гишүүдийнхээ хамт Ерөнхийлөгч Х.Баттулгад үүрэг өгсөн нь өнөөдрийг хүртэлх хугацаанд баримт болон үлджээ. Тус мэдээлэл хийж, нэр дэвшигчдээ үүрэг өгөх үеэр УИХ-ын гишүүн, ШИНЭ намын дарга Ж.Батзандан ч “амлалт” өгч байжээ.

Г.Эрхэс