УИХ-ын гишүүн Н.Номтойбаярыг Хөдөлмөр эрхлэлтийг дэмжих сангийн зээлийн асуудалтай холбогдуулан шалгаж байгаа, энэ хүрээнд бүрэн эрхийг нь түдгэлзүүлэх саналыг прокурорт гаргасан гэх мэдээлэл цацагдсан. Тухайлбал, сайдаар ажиллаж байхдаа нэр бүхий 27 аж ахуйн нэгжид сонгон шалгаруулалтгүйгээр гурав орчим тэрбум төгрөгийг олгосон хэрэгт шалгаж байгаа аж. Энэ талаар түүнээс тодруулахад "АТГ-ын мөрдөгчид ур чадвар муутай байна. Прокурор нь чаддаг юм бол, ичддэггүй юм бол энэ саналаа оруулаад ир. Хэрвээ ийм санал оруулсан бол улс төрийн зорилготой байхыг үгүйсэхгүй" хэмээсэн.

Түүний ингэж хардах болсон шалтгаан нь АТГ-ын дарга Дашдаваа Ерөнхий сайд У.Хүрэлсүхтэй нэг нутгийнх, бүр нухацтай авч үзвэл Ерөнхий сайд Н.Номтойбаяр хоёр хооронд маргаан дэгдсэн, нударга зөрүүлэхдээ тулсан гэдэгтэй холбоотой гэдгийг хэлэх хүмүүс байгаа юм. 

Харин энэ талаар УИХ-ын гишүүн Н.Номтойбаяр "Шударга бусын хонгил гэж ярьдаг даа. Би тэрийг нь үзмээр байна. У.Хүрэлсүх даргатай уулзаад учраа олчих гэнээ. Тийм зүйл байхгүй ээ. Хэрүүл маргаан байсан уу, байсан. Цагтаа болоод дууссан асуудал шүү дээ" гэсэн. Тэгвэл Ерөнхий сайдтай үл ойлголцол үүссэний дараа Өдрийн сонинд өгсөн ярилцлагадаа  эргээд эвлэх, учир начраа ололцох тийм орон зай түүний муужгайдалтаас болж надад үлдээгүй хэмээсэн байдаг. Түүний өгсөн ярилцлагаас онцолж хүргэвэл,  

• Засгийн газрыг огцруулна гээд хэдэн гишүүний гэр орноор явж, архи дарс болж, гарын үсэг зуруулаад явж байна. Энэ бүхний ард Монгол Улсын Шадар сайд Ухнаа овогтой Хүрэлсүх бий. 
• Хүрэлсүх тагнуултай кино их үздэг юм уу хаашаа юм. Тагнуултай кино бага үз. 
• Үндэсний аюулгүй байдал гэдэг бол Хүрэлсүх огт биш. Хаана нь ч хүрэхгүй. 
• Хүрэлсүх өөрөө “Топор” гэх нууц нэртэй, Х.Баттулгын МАН-д шургуулсан гар хөл болсон тагнуулч нь гэдэг нь тодорхой болчихлоо.  Иймэрхүү нөхрийг тагнуулынхан “муужгай” гэдэг юм. 
• Ардчилсан намын гишүүдээс Х.Баттулгаа дэмжээгүй нөхөд байсан. Гэхдээ тэд Хүрэлсүх шиг манай намынхантай хуйвалдаж муужгайдаагүй.  
• Хүрэлсүхээр муужгайдуулаад байгаа М.Энхболд түүнийг зүтгүүлсээр байгаад Ч.Сайханбилэгийн Засгийн газарт Шадар сайд болгосон.  
• Хүрэлсүх “топор” муужгайдсаныг мэдэж, түүнийг сая таньсан зарим нь гарын үсэг зурсанаасаа буцаж буй хүмүүс бас байна. 
• Би энэ ярилцлагаараа түүнийг эсэргүүцэх эсэргүүцлээ эхлүүлж байгаа гэдгээ хэлчихье. 
•  Эргээд эвлэх, учир начраа ололцох тийм орон зай түүний муужгайдалтаас болж надад үлдээгүй. 
• Хүрэлсүх олон тэрбумын хөрөнгийн эх үүсвэрээ тайлбарла л даа. “Солонгост ажилладаг эгч маань надад мөнгө явуулдаг” гэж ярьж байсан. Эсхүл ямар ч бизнесгүй гэх хүн эгчээрээ тэжээлгэсээр байгаад тэрбумтан болчихов уу.

хэмээж байжээ.

Г.Алимаа