Эрүүгийн хуульд нэмэлт, өөрчлөлт оруулах тухай хуулийн төслийг УИХ-аар хэлэлцэж буй. Хуульд өөрчлөлт орсноор хөөн хэлэлцэх хугацааг Гэмт хэрэг үйлдсэн өдрөөс хойш яллагдагчаар татах хүртэл тоолдог болох юм.

Мөн УИХ-ын сонгуулийн тухай хуульд шүүхээс өмнө нь ял эдэлж байсан хүн нэр дэвших боломжгүй болсон. Үүнтэй холбогдуулан хэвлэл мэдээллийн хэрэгслүүд УИХ-ын гишүүдээс нэр дэвших боломжгүй гишүүдийг нэрлээд эхлэв. Мөн зарим иргэдийн үзэж байгаагаар уг хуулийн заалт нь МАХН-ын дарга Н.Энхбаярт зориулагдсан ч гэж ярьж буй.

Энэ талаар УИХ-ын гишүүн Т.Аюурсайхан “Хөөн хэлэлцэх хугацааны нугалааг засах, ял завшсан хүмүүсийн хэргийг сэргээх, "Эдийн засгийн ил тод байдлын тухай" буюу өршөөлийн хуулийг хүчингүй болгож, 34 их наяд төгрөгийг шалгах, авлига албан тушаалын гэмт хэрэг үйлдсэн нь шүүхээр тогтоогдсон хүмүүсийг сонгуульд нэр дэвшүүлэхийг хориглох санаачилга гаргаж эхнээс нь хэрэгжүүлж байгаа минь зарим бүлэглэлийн эрх ашгийг хүндээр хөндсөн бололтой.

Дайралт, доромжлол, гүтгэлэг хэчнээн ч явсан, хана мөргөх нь тодорхой. Улс төрд өнөөдрийг хүртэл өөрийн гэсэн толгойтой, өөрийн гэсэн баг, нөхөдтэй, хэнээс ч хамааралгүй, хэнд ч өргүй, зөвхөн эх орноо гэсэн сэтгэлээр, олон түмнийхээ захиас даалгавраар оюун ухаан, эрдэм мэдлэгээ дайчлан, залуу насаа зориулан хөдөлмөрлөж байгааг минь олон хүн харж, мэдэрч байгаа байх аа” гэсэн юм.

Б.Лхам