АТГ-аас нэр бүхий Элчин сайдыг Улаанбаатарт ирээд байхад нь хилийн хориг тавин шалгаж эхэлсэн тухай мэдээлэл цацагдаад байгаа билээ. Түүнийг оффшор бүсэд мөнгө угаасан гэх асуудлаар шалгаж буй юм. Энэ талаар АТГ-аас “Оффшор бүсэд мөнгө угаасан гэх Элчин сайдыг АТГ-ын мөрдөгч нар илрүүлэн шалгаж байна. Энэ нь ямар нэг гомдол, мэдээллийн мөрөөр хийж буй ажил биш. Цэвэр ажиллагааны илрүүлэг гэсэн үг. Улаанбаатарт болсон Элчин сайдуудын цугларалтад ирээд байхад нь шалгаж эхэлсэн. Одоогоор түүнд хилийн хориг тавьсан” хэмээн мэдэгдсэн байдаг.

Тэгвэл оффшор бүсэд мөнгө угаасан хэргээр шалгаж эхэлсэн Элчин сайд нь А.Баттөр юм байна. Түүний хувьд Ерөнхийлөгч асан Ц.Элбэгдоржийн Аюулгүй байдал, гадаад бодлогын зөвлөхөөр ажиллаж байсан нэгэн. Өдгөө Монголоос Франц Улсад суух Элчин сайдаар ажиллаж буй. 

Өмнө нь Батлан хамгаалахын дэд сайдаар ажиллаж байсан юм. Ховд аймгийн харьяат, АН-ын гишүүн. Эдийн засагч мэргэжилтэй нэгэн. 2012 оноос Батлан хамгаалахын дэд сайдаар ажиллаж байжээ.

Тэрбээр Москвагийн Олон улсын харилцааны дээд сургууль, Шинэ Зеландад Викторийн их сургууль, Бельгийн Вант улсад Европын стратеги, Олон улсын харилцааны төвийг төгссөн.

Хөгжлийн ухааны магистр цолтой. ГХЯ-нд атташе, Франц улс дахь ЭСЯ-нд соёлын атташе, ЮНЕСКО-гийн Байнгын төлөөлөгчийн газарт дипломат ажилтан, ГХЯ-ны Төрийн захиргааны удирдлагын газрын захирал, 1998-2000 онд Боловсрол, соёл, шинжлэх ухаан, технологийн сайд, 2004-2006 онд Гадаад хэргийн дэд сайд, 2008 оноос Монгол Улсаас БЕНЕЛЮКС-ийн орнууд, Европын хамтын нийгэмлэгт суугаа Онц бөгөөд Бүрэн эрхт Элчин сайдаар ажиллаж байсан олны танил улстөрч, дипломатч юм.

Г.Эрхэс