Засгийн газрын өнөөдрийн ээлжит хуралдаанаар хэд хэдэн асуудлыг хэлэлцжээ. Улмаар 2020 оны нэгдүгээр сарын 1-нээс төрийн албан хаагчдын цалинг найман хувиар нэмэх шийдвэр гаргасан байна. Мөн төрийн үйлчилгээний албан хаагчдад алба хаасан хугацааны нэмэгдэл олгохоор болжээ.

190 мянган төрийн албан хаагчийн дундаж цалин 1070.0 мянган төгрөгт хүрэх бөгөөд энэ нь 2014 оны нэмэгдлээс хойш 48.9 хувиар нэмэгдэж байна гэсэн үг юм.

2019 оны III улирлын байдлаар сарын дундаж цалин 1166.4 мянга, төрийн албан хаагчдын дундаж цалин 922.8 мянган төгрөг байна. Засгийн газар цалинг 2018, 2019 онд тус бүр найман хувиар, цэцэрлэг, ерөнхий боловсролын болон мэргэжлийн боловсрол олгох сургалтын байгууллага, шинжлэх ухааны салбарын төрийн үйлчилгээний албан хаагчдын цалинг 21.7 хувиар нэмж байгаа аж.

Улсын хэмжээнд 200 мянган төрийн албан хаагч, 300 мянган иргэн тэтгэвэр авдаг. Цалин нэмэгдэхэд үнэ өсдөг гэх шүүмжлэл байдаг. Өмнөх жилүүдэд цалин тэтгэврийг эдийн засгийн тооцоо судалгаагүй огцом 20-30 хувиар нэмж байсан учир өсөлтийг дагаад өргөн хэрэглээний барааны үнэ өсдөг байсан. Харин энэ удаад цалин, тэтгэврийг инфляцийн дундаж өсөлттэй уялдуулан нэмсэн учир үнэ өсөх эдийн засгийн үндэсгүй гэнэ.

С.Сүлд