Уул уурхайн салбарт багагүй олон жил үйл ажиллагаа явуулахдаа олон аав, ээж, балчир үрсийн нулимсыг урсгасан нэгэн компани бий. Салбарын сайд байтугай Улсын сайд нь хүртэл тушаал гаргаад ч хаалгыг нь барьж дөнгөдөггүй эл компанийг "Эко Алтан Заамар" гэх.

Төв аймгийн Заамар сумын Хайлааст багийн нутаг дэвсгэр Баянголын ам гэх газарт үйл ажиллагаа явуулдаг, хоёр удаагийн ослоор таван иргэний амь хохирсон гэдгээр нь иргэд жич мэднэ. Алтны судал дагаж, халаасаа дүүргэж ирсэн эл компани нэгэнт хар дансанд багтсан "Эко Алтан Заамар" нэрээ өөрчлөхөөр зар хүртэл өгсөн байх юм.

Энэ нь Бүрдэл Майнинг ХХК.

Магад нэрээ солиод ч хамаагүй муу нэрнээс холдоё гэж бодсон байх. Гэвч могой арьсаа гуужуулаад ч могой чигээрээ үлддэг гээчээр Эко Алтан Заамарынхан нэрээ мянга өөрчлөөд ч муу нэрнээс, хуулийн савраас, олон нийтийн хараанаас мултрах нь юу л бол.

Эко Алтан Заамарт гарсан ослын улмаас дөрвийн дөрвөн сайхан залуу амиа алдаж, ар гэрийнхэн нь өнчирч хоцорсон. Осол болох үед үүд хаалгыг нь барилаа гэж дээр дооргүй шуугисан ч тэр нь худлаа болж таарсан. Энэ сарын эхээр дахиад нэгэн залуу амиа алдсанаар энэ бүхэн нь ил болж, салбарыг тэр чигт нь хөдөлгөх шалтаан болж байв.

Тиймдээ ч Эко Алтан Заамарын ханаж, цаддаггүй эзэд Монголын газар шороог дахиж ухаж төнхөхийн тулд нэрээ солихоор зэхэж буй бололтой.

Оноосон нэрийг солих нь хуулиар зөвшөөрөгддөг ч муу нэрнээс салахын тулд дахиад шинэ нэр авах нь бизнесийн болоод хувь хүний этикт байж боломжгүй мэт. 

Эко Алтан Заамарынхан хуулийн этгээдийн оноосон нэрээ өөрчилж болно. Гэхдээ ард түмэнд тэднээс нэхэх өр өчнөөн бий. Ядаж л хэрэг хуучирдаггүй гэдэг шиг иргэн бүр, хуулийн этгээд бүр тэднээс өнгөрсөн хийгээд одоо, ирээдүй үеийнх нь хариуцлагыг нэхэж, шаардаж байх нь зүй биз ээ.

Г.Нацаг