Монгол Улсын генералууд хэдхэн цагийн дараа Тагнуулын ерөнхий газрын дарга Д.Гэрэл, Цагдаагийн ерөнхий газрын дарга С.Баатаржав, Улсын онцгой комиссын нарийн бичгийн дарга М.Энх-Амар гэсэн гурван генералаар эгнээгээ тэлэх гэж байна. Тэдэнд генерал цол олгох зарлигийг Ерөнхийлөгч Х.Баттулга энэ сарын 27-нд гаргасан бөгөөд маргааш буюу Монголын Үндэсний эрх чөлөө, тусгаар тогтнолыг сэргээсний 108 жилийн ойн баяраар гардуулах юм.

Генералууд эгнээгээ тэлж буй нь сайхан мэдээ ч тэдний заримд  насандаа суух цаг ирсэн гэдгийг сануулах нь харамсалтай.

Учир нь Тагнуулын ерөнхий газрын даргаар хоёр дахь удаагаа томилогдон ажиллаж байгаа хурандаа Д.Гэрэл 1952 онд төрсөн гэхээр насандаа суух цаг хэдийн болчихсон. Гэтэл даргын суудлаа тавьж өгөхгүй жил гаран гүрийсэн нь генералын мөрдэс горилсонтой шууд холбоотой гэдгийг учир мэдэх хүмүүс хэлээд удаж буй. Тэгвэл тэрбээр санасандаа хүрч генералын мөрдэс зүүх цаг ийн ирлээ. Эх сурвалжийн хэлснээр хурандаа Д.Гэрэл генералын мөрдэс зүүснийхээ дараа буюу 2020 оноос ажлаа өгөх сурагтай. Угаасаа он гараад тэрбээр 68 нас хүрнэ. Төрийн тусгай статустай байгууллагыг өдий насандаа удирдаж байсан хүн түүнээс өөр байхгүй. Энэ ч утгараа түүхэнд бичигдэхээр гэхэд хэтрүүлсэн болохгүй болов уу.  

Орос гуравдугаар сургууль төгсөж, ОХУ-д Улсыг аюулаас хамгаалахын дээд сургууль, Токиогийн Гадаад хэлний дээд сургуулийг дүүргэсэн. НАХЯ-ны УАХЕГ-т ажилтан, ахлах ажилтан, Токио дахь ЭСЯ-нд дипломат ажилтан, УАБХГ-ын Тамгын хэлтсийн орлогч, Гадаад тагнуулын албаны дарга, Токио дахь ЭСЯ-нд зөвлөх консул, мөн ЭСЯ-нд зөвлөх консулын хэлтсийн дарга, БНСУ-д суугаа Монгол Улсын Бүрэн эрхт Элчин сайдаар тус тус ажиллаж байсан.

Түүнчлэн өмнө нь ТЕГ-ын даргаар 2012 оны дөрөвдүгээр сарын 18-нд томилогдож, 2013 оны тавдугаар сарын 18-ныг хүртэл ажиллаж байсан. Дараа нь хошууч генерал Б.Хурцаас тагнуулын албаны даргын үүргийг шилжүүлж авсан гэдгээс харахад мундаг боловсон хүчин гэдэг нь харагдах биз ээ.

Ийнхүү хурандаа Д.Гэрэл генерал мөрдэс зүүж, тагнуулын байгууллага ээлжит даргаа угтаж авахад бэлтгэх хэрэгтэй болж байх шиг байна. Чухам хэний хүү тагнуулын байгууллагын толгойлох бол гэдэг асуулт шинэ оны хамгийн дуулиантай сэдвээр тодрох нь лавтай. Гэхдээ Засгийн газрын 2017 оны арваннэгдүгээр сарын 2-ны өдрийн  хуралдаанаар хошууч генерал Б.Хурцыг үүрэгт ажлаас нь чөлөөлж, хурандаа Д.Гэрэлийг оронд нь томилсон нь гэнэтийн хэрэг лав байгаагүй.

Энэ утгаараа Д.Гэрэл даргын залгамжлагч хэдийн тодорсон байхыг ч үгүйсгэхгүй юм.

Г.Нацаг-Эрдэнэ