Ахмад настны тэтгэврийг нэг удаадаа тэглэх шийдвэрийг Үндэсний аюулгүй байдлын зөвлөлөөс гаргасан гэж Монгол Улсын Ерөнхийлөгч Х.Баттулга мэдэгдсэн билээ. Тэгвэл УИХ-ын гишүүн О.Баасанхүү хуулийн төсөл санаачилсан талаараа өнөөдөр мэдээлэл хийх үеэрээ “Зээлтэй ахмадуудын тэтгэврийг нэг удаа тэглэх юм бол зээл аваагүй ахмад настныг мөн орхиж алагчилж болохгүй. Тэдэнд мөн зээл авах боломж олгох эсвэл, мөнгийг нь олгодог ч юм уу. Ямар нэг байдлаар эрх тэгш байх ёстой. Төр иргэдээ ялгаварлаж болохгүй.

Эрх баригчдаас хоёр асуудлыг тодорхой болгохыг шаардаж байна. Нэгдүгээрт, Салхитын мөнгөний ордыг төрд өмчлөх шийдвэр шүүхээр эцэслэн шийдэгдсэн үү. Хоёрдугаарт, төрд 230 мянган ахмадын тэтгэврийг тэглэх 776 тэрбум төгрөг бий юү.

Алт олборлохдоо өөрийнхөө мөнгөөр ухаж гаргах, эсвэл хэн нэгнээр ухуулаад ашгаа авах, бонд гаргах замаар шийднэ гэвэл зээл авах гэсэн гурван арга бидэнд бий. Гэтэл Тавантолгойн орд өнөөдрийг хүртэл бонд гаргаж чадаагүй.

Өр тэглэхэд 776 тэрбум буюу 200 орчим сая ам.доллар шаардлагатай. Хэрвээ мөнгө нь байгаа юм бол цагаан сараас өмнө ахмадуудын зээлийг нь тэглэж, зээл аваагүйд нь мөнгө өгөх хэрэгтэй.

Ахмадуудын тэтгэврийг тэглэнэ гэхэд арилжааны банкууд баярлаж байх шиг байна. Эрсдэлийг нь төр даах юм бол хариуцлагыг төр үүрнэ. Иргэд малаа барвцаалаад зээлийн авдаг. Нийт зээлийн 80 хувь нь мал барьцаалсан зээл.  Монгол Улс 70.1 сая малтай гэдэг ч яг үнэндээ бүгдээрээ шахуу "Хаан" банкны барьцаанд орсон. "Хаан" банкныхан баярлаж байгаа. 

Ерөнхийлөгчийн Х.Баттулга оффшорын 17 тэрбумыг оруулж ирээд тэтгэвэр, цалин, оюутны зээлийг тэглэнэ гэсэн. Сонгуулиар тэгж шоудаж, амлаа биз дээ.

Оффшор замхарсан учраас Салхитын мөнгөний орд гэсэн сэдэв гаргаж ирээд түүнийг эдийн засгийн эргэлтэд оруулах юм ярилаа. Гэтэл ордын өмчлөгч нь хаана байна вэ. Төрд мөнгө байхгүй. "Ичсэн хүн хүн ална" гэдэг шиг МАН-ынхан мөнгө хэвлэж магадгүй шүү.

Г.Эрдэнэ