УИХ-ын чуулганы хуралдаанаар Эрүү, Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай, Шүүхийн шийдвэр гүйцэтгэх тухай хуульд, Зөрчил, Зөрчил шалган шийдвэрлэх тухай хуульд нэмэлт, өөрчлөлт оруулах тухай хуулийн төслүүд болон хамт өргөн мэдүүлсэн бусад хуулийн төслүүдийг хэлэлцэж, санал бүрээр санал хураалаа. Хэлэлцэж буй асуудалтай холбогдуулан УИХ-ын гишүүн байр сууриа илэрхийлж, асуулт тодруулга авлаа. Тухайлбал,

УИХ-ын гишүүн О.Баасанхүү: Бэлгийн дарамтыг Зөрчлийн хуулиас хасаад Эрүүгийн хуульд оруулсан гэж бодсон. Гэтэл буцаад Зөрчлийн хуульдаа орж байна. Хүчингийн гэмт хэрэг өссөөр байна. Ажлын байрны бэлгийн дарамт гэдэг бол аймшигтай зүйл. Бусад улсад энэ төрлийн гэмт хэргийг Эрүүгийн хэргээр шийддэг. Гэтэл бид хандлагын зөрчлөөр, харьцааг нь эрүүгээр шийдье гэдэг байдлаар хандаж болохгүй.

УИХ-ын гишүүн Н.Оюундарь: Өргөн барьсан хуульд анх 50 мянган төгрөгөөр торгоно гэж байснаа дараа нь 100 мянган төгрөг болгож оруулж ирсэн байсан. Одоо нэг сая төгрөг гэж байна. Мөнгөнөөс илүү хүний нэр хүнд чухал. Энэ төрлийн гэмт хэргийн хохирогчдын  90 орчим хувь нь эмэгтэйчүүд. Дэлхий даяар ажлын байран дахь бэлгийн дарамтын эсрэг тэмцэж байхад монголчууд бид яагаад тэмцэхгүй байгаа юм бэ. Ганцхан сая төгрөгөөр торгоно гэдэг бол чамлалтай байна.

УИХ-ын гишүүн Х.Нямбаатар: О.Баасанхүү гишүүн ээ, та уг нь ажлын хэсэгт орсон шүү дээ. Гэтэл нэг ч удаа ирээгүй. Хэрэв илэрхийллээ үйлдэл болгосон бол ажлын байрны дарамт, хүчиндсэн бол хүчиндэх гэмт хэрэг болгоё гэж ажлын хэсэг дээр ярилцсан. Ажил олгогч нь хандлагаа өөрчилж, дотоод журамдаа тогтоох хэрэгтэй. Ажил дээрээ тоглоом, шоглоомоор ямар нэг үйлдэл үзүүлдгийг ажлын байрны хүчирхийлэл болно гэдгийг ойлгох ёстой.

УИХ-ын гишүүн М.Билэгт: Хувийн хэвшлийнхэн ажиллах боломж алга. Хоног тутамд 0,3 хувийн хүү ногдуулна гэдэг чинь юу гэсэн үг юм бэ. Мөнгөгүй болоод л төлж чадахгүй байгаа биз дээ. Дандаа торгууль ярина. Зөвхөн зөрчлийн тухай хууль гарснаар 300 тэрбум төгрөгийн орлого төсөвт орж. 0,3 хувь гэдэг чинь арав хоногт  9 хувь шүү дээ. Монголд тэгэхээр ажиллах арга алга.

УИХ-ын гишүүн Ж.Ганбаатар: Гадаадад хугацаандаа татвараа төлсөн тохиолдолд 20, 30 хувийн хөнгөлөлт үзүүлдэг. Гэтэл манайд торгоно, хүү төлүүлнэ гэж дарамтладаг.

Г.Эрдэнэ