УИХ-ын чуулганы ээлжит хуралдаанаар ажлын хэсгээс гаргасан “стандартад нийцсэн утааны шүүлтүүргүй дизель хөдөлгүүртэй автобус, ачааны автомашиныг автозамын хөдөлгөөнд оролцуулсан, эсвэл агаарын бохирдлоос хамгаалсан, урьдчилан сэргийлсэн тодорхой нутаг дэвсгэрт хориглосон захиргааны хэм хэмжээний актыг зөрчсөн, хориглсон бүсэд түүхий нүүрс тээвэрлэсэн, эсхүл нэвтрүүлэхээр тээвэрлэсэн бол зөрчилтэй эд зүйлийг хурааж, хүнийг 100 нэгжтэй тэнцэх, хуулийн этгээдийг 1000 нэгжтэй тэнцэх мөнгөөр торгоно” гэсэн саналд Б.Энх-Амгалан, О.Баасанхүү, Ш.Раднаасэд гишүүн үг хэллээ.

Б.Энх-Амгалан: Улаанбаатар хотын нийтийн тээвэрт ашиглаж байгаа 890 автобус бүнд зөрчилтэй шүү дээ. Бүгдээрэээ актлагдах болсон. Ингэхээр яах юм бэ. Компанийг торгох юм уу. Яах юм. Үүнийг асуумаар байна. Санал алга.

Ш.Раднаасэд: Түүхий нүүрс зөөвөрлөх гэлээ. Хэрэглэгч талдаа хариуцлагын асуудлаа ярихгүй юм аа. Өөрөөр хэлбэл, Улаанбаатар хотоор дамжин өнгөрч байгаа автомашин хотын дундуур зорчиж болохгүй юм уу. Хотоос тойрч явах юм уу. Нэг мөр ойлголтод хүрэхгүй бол цагдаа нар торгууль зурдаг болно шүү. Нөгөөтэйгүүр, утааны шүүлтүүртэй нь ил харагддаг юм уу. Тонгойгоод харвал харагдах уу. Жолооч нарт дараа болох вий.

О.Баасанхүү: Хууль гарч болно. Хамгийн сайханаар бичиж, тавиад. Ард түмний л төлөө. Гэхдээ нөхцөл нь бүрдээгүй хууль эсрэгээрээ дарамт болдог. Жишээлбэл, стандартад нийцсэн утааны шүүлтүүр тараасан юм уу. Шүүлтүүртэй автомашин Монголд байна уу. Үүнийгээ тодорхой болгоогүй байдаг. Гэтэл хууль батлагдаад хэрэгжээд эхэлчихдэг. Нөгөө юм нь байдаггүй. Тэгэхээр яах уу.

Гишүүд үг хэлж дууссны дараа санал хураасан. Чуулганы хуралдаанд суусан 40 гишүүнээс 22 гишүүн нь дэмжсэнээс санал дэмжигдлээ.

Г.Эрдэнэ