УИХ-ын ээлжит чуулганы үдээс хойшхи хуралдаанаар Эрүү, Эрүүгийн хэрэг хянан шийдвэрлэх тухай, Зөрчил, Зөрчил хянан шийдвэрлэх тухай, Шүүхийн шийдвэр гүйцэтгэх тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг хийж байна.

Чуулганаар Хууль зүйн байнгын хорооны дэмжээгүй саналд санал хураалаа. Тодруулбал, УИХ-ын гишүүн Н.Оюундарь “Бусдад ажил, албан тушаал, нэр төр, алдар хүнд, эд хөрөнгө, сэтгэл санааны болон бусад байдлаар хохирол учруулах үр дагавар бүхий тэвчишгүй орчин үүсгэж бэлгийн харьцааны шинжтэй үйлдэл хийх сэдлээ үг хэлээр, биеэр, эсхүл өөр хэлбэрээр илэрхийлсэн бол хүнийг 100 нэгжээс 500 нэгжтэй тэнцэх хэмжээний төгрөгөөр торгох, эсхүл албадан сургалтад хамруулж 7-30 хоногийн хугацаагаар баривчлах шийтгэл оногдуулна.

2.Ажил олгогч хөдөлмөрийн дотоод журамд ажлын байрны бэлгийн дарамтыг үл тэвчих орчин бүрдүүлэх, урьдчилан сэргийлэх үүргээ биелүүлээгүй, гарсан гомдлыг шийдвэрлэх хэм хэмжээг тусгах үүргээ биелүүлээгүй бол тухайн байгууллагын удирдлагыг 1000 нэгжээс 5000 нэгжтэй тэнцэх хэмжээний төгрөгөөр торгоно” гэсэн саналд санал хураахад 52 хувийн саналд авч дэмжигдлээ.