Монгол Улсын Ерөнхийлөгч Х.Баттулга тэтгэврийн зээлтэй иргэдийн зээлийг нэг удаа тэглэх ҮАБЗ-ийн шийдвэр гаргасан талаар танилцуулсан билээ. Уг асуудалтай холбогдуулан өнөөдөр Засгийн газар хуралдсан. Тэгвэл МАХН-аас тэтгэврийн зээлгүй 176 мянган ахмадад 1 сая төгрөг олгох нь зүйтэй гэдгийг мэдэгдлээ. Тодруулбал, "Манай нам 2019 онд “Өргүй Монгол” үндэсний хөтөлбөр улс орон даяар хэрэгжүүлсэн. Ингэхдээ өрийн дарамтад байгаа иргэдийн судалгааг хийж, тэдэнтэй нүүр тулан уулзсанаар өрийн дарамтаас чөлөөлөх ёстой гэх дүгнэлт гаргаж байлаа. Гэтэл биднийг улстөржлөө гэж олон иргэн шүүмжилсэн. Харин Монгол Улсын Ерөнхийлөгч бидний гаргасан энэ санааг дэмжиж байгаа юм байна. Тиймдээ ч ҮАБЗ-өөс ийм шийдвэр гаргасан болов уу. Гэхдээ асуудлыг цогцоор шийдэх ёстой. Түүнээс биш аль нэг хэсгийг тайрвал эцсийн үр дүнг буруугаар эргүүлэх эрсдэлтэй.

Тэтгэврийн зээлийг цагаан сараас өмнө тэглэх ёстой.

Гэхдээ татвар төлөгчдийн мөнгөөр бус, авлига, оффшорын хөрөнгөөр тэглэх учиртай гэдгийг дахин сануулж байна. Учир нь төсвийн мөнгөөр өр тэглэвэл ард түмний нуруун дээр улам их ачаа ирнэ. Үүнээс гадна хэрвээ тэтгэврийн зээлтэй ахмадуудын зээлийг нэг удаа тэглэх юм бол тэтгэврийн зээлгүй 176 мянга орчим ахмадад нэг сая төгрөг олгох нь зүйтэй" гэлээ.

Г.Эрдэнэ