Улсын дээд шүүх өнгөрсөн долоо хоногт Монголын Үндэсний сэргэн мандлын намыг улсын бүртгэлд бүртгэхээс татгалзсан шийдвэр гаргасан байдаг. Тодруулбал, энэ сарын 9-нд болсон хурлаар иргэн Т.Ганболд нарын Монголын Үндэсний сэргэн мандлын намыг улсын бүртгэлд бүртгүүлэх хүсэлтийг хянан хэлэлцсэн байдаг. Хурлаас тус намыг бүртгүүлэх хүсэлт нь Улс төрийн намын тухай хууль, Хуулийн этгээдийн улсын бүртгэлийн тухай хууль болон бусад хуульд заасан шаардлагыг хангаагүй хэмээн үзсэнээр бүртгэхээс татгалзсан юм. Яг ийм, шалтгаан үндэслэлээр өмнө нь тус намыг бүртэхээс татгалзсан удаатай.

Тэгвэл Т.Ганболд нарын зүгээс МҮСМН-ыг үүсгэн байгуулах хурлын зарыг хоёр ч өдөр тутмын сонинд нийтлүүлжээ.

Уг зарлалд дурдсанаар “2019 оны арваннэгдүгээр сарын 8-ны өдөр хуралдсан үүсгэн байгуулах хурлын баримт бичгүүдийг хянан хэлэлцсэн Дээд шүүхээс намыг үүсгэн байгуулагч 801 гишүүний төлөөллийг бүрэн оролцуулах шаардлага тавьсны улмаас тус намыг үүсгэн байгуулах хурлыг 2020 оны гуравдугаар сарын 15-нд дахин зарлаж байна. Хурал Корпорейт Конвейшн концертын их танхимд болно.

Иймд манай намыг үүсгэн байгуулсан 801 гишүүнээс гадна, Монгол Улс, Монгол үндэстнийг сэргээх үзэл баримтлал, оюуны үнэт зүйл, хөтөлбөр бүхий энэ үйл ажиллагаанд нэгдэн дэмжих хүсэлтэй нийт монголчуудыг бидэнтэй нэгдэн хуралдахыг хүсч уриалж байна” гэжээ.

МҮСМН-ыг үүсгэн байгуулагч Т.Ганболдын хувьд МАН-ын гишүүнчлэлтэй явсан нэгэн ч өөрийн хүсэлтээр татгалзсан байдаг. Түүнийг олон нийт "Алтан дорнод Монгол" компанийн захирал гэдгээр нь эчнээ танина.

Тэрбээр МАН-ын гишүүнчлэлээс татгалзсаныхаа дараа ХҮН-д элссэн байдаг ч дотоод зөрчлийнхөө үүднээс саяхныг хүртэл ямар нэгэн намын харьяалалгүй явж ирсэн билээ.

Харин энэ удаад Т.Ганболд нам байгуулах зорилгоор УИХ-ын сонгуульд оролцох бэлтгэлээ ийнхүү базааж эхэлсэн бололтой. Өдгөө Дээд шүүхэд албан ёсны бүртгэлтэй 35 нам үйл ажиллагаа явуулж байна.

Сануулахад Т.Ганболд Улсын ерөнхий прокурор, Хуулийн сайд асан Д.Дорлигжавын дүүгийн компанийн данс руу дөрвөн сая ам.доллар шилжүүлсэн гэх асуудлаар шалгуулж байсан билээ. Мөн Л.Оюун-Эрдэнэ, Т.Аюурсайхан, Ж.Батзандан, Л.Болд, Х.Нямбаатар нарын гишүүдийн зохион байгуулсан МАНАН дэглэмийн эсрэг жагсаалд оролцож, байр сууриа илэрхийлж байсан удаатай.

Г.Эрхэс