Улсын онцгой комисс өнөөдөр хуралдлаа. Хуралдаанаар шинэ төрлийн коронавирустэй холбоотой асуудлаар хэлэлцжээ.

Энэ талаар Эрүүл мэндийн сайд Д.Сарангэрэл “Коронавирустэй холбоотой гурван удаа эрсдэлийн үнэлгээ хийлээ. Эхний удаад дунд зэргийн эрсдэлтэй байна гэж дүгнэсэн. Дараа нь дундаас дээш, гурав удаагийн үнэлгээгээр өндөр эрсдэлтэй орны тоонд орсон. БНХАУ-ын 31 мужид бүгдэд нь халдвар илэрсэн. Төвөдөд өнөөдөр уг өвчлөл илэрсэн байна.

Өнгөрсөн долоо хоногийн баасан гарагт Улсын онцгой комисс шуурхай хуралдсан. Хурлын дараа ЭМЯ, ДЭМБ нар хамтран ажиллаж, коронавирус илрүүлэх оношлуурыг авсан. Мөн ДЭМБ-аар дамжуулан 2000-3000 оношлуур оруулж ирэхээр ажиллаж байна. Түүнчлэн маскны асуудал чухлаар тавигдаж байна. Маскийг Эрүүл мэндийн яам хийдэггүй. Эм тариа, эм эмнэлгийн бодис, ариутгалын бодис, маск зэрэг бүгд хувийн хэвшилд очсон. Бид маскны нэг үйлдвэртэй. Уг үйлдвэр түүхий эдээ БНХАУ-аас авдаг. Гэтэл тухайн түүхий эдээ авдаг мужид халдвар гарсан. Гэхдээ Монгол Улсын маскны нөөц дуусаагүй.

Хоёрдугаарт, хувийн хэвшлийн байгууллагууд өөрсдийн дотоод нөөц бололцоогоороо улсынхээ маскны хэрэглээг хангах талаар сайхан мэдээтэй байна. Улсын хэмжээнд 15134 эмнэлгийн ор байна. Үүний 2000-ийг вирусээс урьдчилан сэргийлэхэд хэрэглэх боломжтой. Мөн энэ хүрээнд эмнэлгийн байгууллагууд бэлэн байдалд ажиллаж байна.

Эрүүл мэндийн яам тусгай объект судлах чиглэлээр ажиллаж байна. Учир нь Австрали, Америк, Япон зэрэг улсуудын туршлагаас харвал гадаадад байгаа ялангуяа Ухань хотоос иргэдээ авчрахдаа тусгай объектэд оруулж шинжилж, эмчилж байна.

Бидэнд ганц байхгүй байгаа зүл нь эмч нараа хамгаалах хэрэгсэл дутмаг байна. Шинэ халдвар тархсан үед сүүлийн үеийн хамгаалах хэрэгслийг бүрдүүлэх зайлшгүй шаардлагатай. Тиймээс Эрүүл мэндийн яам хамгаалах хэрэгслийн тусламж гуйна” гэлээ.

Б.Лхам