Улсын онцгой комисс хуралдаж дууслаа. Хуралдаанаар хэлэлцсэн асуудлын талаар хотын дарга С.Амарсайхан танилцууллаа.

-Улсын онцгой комиссын хуралдаанаар юу ярилцсан бэ?

-Улсын онцгой комиссоос мэргэжлийн байгууллагууд өөрсдийн чиг үүргийн хүрээнд үйл ажиллагаагаа явуулах зэрэг ажлууд яригдаж байна.

-Нэмж хорио цээр тогтоох болов уу?

-Нэмж хорио цээр тогтоох асуудал байхгүй. Харин одоо авч хэрэгжүүлж байгаа ажлуудаа хэвийн явуулах, хүүхэд багачуудын сургалтын хөтөлбөрийг тасалдуулахгүй байх, тэдний аюулгүй байх асуудлын талаар яригдаж байна.

-Шинэ төрлийн коронавирусын тохиолдол илэрсэн илрээгүй гээд л янз бүрээр ярьж байна л даа. Нийслэлчүүд айдасгүй байж болох уу?

-Засгийн газрын өгсөн үүрэг чиглэлийн дагуу Эрүүл мэндийн яам бусад албаны мэдээлэлд тулгаарлан иргэдэд мэдээлэл өгч байгаа. Өнөөдрийн байдлаар шинэ төрлийн вирус илэрсэн асуудал байхгүй байна. Харин урьдчилан сэргийлэх ажлыг сайн хийхээс гадна иргэд олон нийтийн оролцоотой хийх асуудал юм.

-Тусгаарласан 13 хүний асуудлыг хуралдаанаар ярьсан уу?

-Хяналтад явж байгаа. Ямартай ч эрсдэлтэй зүйл байхгүй гэж үзсэн. Халдварын тархалт өргөн байгаа учраас ирэх саруудад ямар ажил хийх талаарх бэлтгэл ажлыг хангах зэрэг талаар яригдаж байна.

-Бэлтгэл ажлыг хангахад хэдийн хэмжээний төсөв шаардлагатай вэ?

-Нийслэлээс шаардлагатлай хөрөнгийн асуудлыг шийдвэрлэж өгсөн. Энэ хүрээнд эрүүл мэндийн байгууллагын ажилтнууд шаардлагатай хэрэгслээ хангаж эхэлсэн. Мөн Улаан загалмайн шугамаар орж ирж байгаа тусламжийн бараа зэрэг орж ирнэ. Нийслэлээс урьдчилсан байдлаар 500 орчим сая төгрөгийн зардал гарсан.

-Хотын даргын хувьд сар шинийн баярыг тэмдэглэх эсэх тал дээр ямар байр суурьтай байна вэ?

-Дэлхий нийтээрээ асуудал хүндэрсэн цаашид яах нь тодорхойгүй байгаа энэ үед баяр ёслол хийх зохимжгүй. Болж өгвөл эрсдэлийг багасгах нь хамгийн зөв. Сар шинийн баяр тэмдэглэхгүй гэх нь ч юу юм гэр бүлийн хүрээнд ёслоод өнгөрөх нь зүйтэй гэж харж байна.

Б.Лхам