УИХ-ын гишүүд өөрсдийн өгсөн саналаасаа эргэж буцан байж эцэстээ дахин санал хураалт явуулснаар Н.Номтойбаяр гишүүний бүрэн эрхийг парламент түдгэлзүүллээ. Улсын ерөнхий прокуророос УИХ-ын гишүүний бүрэн эрхийг түдгэлзүүлэх саналыг дөрөв дэх удаагаа тавьснаар ийнхүү биеллээ олсон хэрэг. Эхний гурав нь өмнөх прокурор Б.Энх-Амгалан, УИХ-ын гишүүн Г.Солтан, Д.Дамба-Очир, Л.Энхболд, Б.Ундармаа, Д.Мурат нарт хамаарах ч эрүүл мэндийн шалтгаанаар албан ажлаасаа түр хөндийрөөд байсан Б.Жаргалсайхан бүрэн эрхийнхээ хүрээнд Н.Номтойбаярт холбогдох асуудлыг парламентаар хэлэлцүүлэхээр оруулсныг гишүүдийн олонхи дэмжсэн хэрэг.

Нэгэнт халдашгүй бүрэн эрхийг нь түдгэлзүүлсэн учраас Н.Номтойбаяр гишүүнийг прокурорын байгууллагаас шалгахад ямар нэгэн хаалт байхгүй гэсэн үг. Энгийн иргэний хувиар тэрбээр хуулийн байгууллагад үнэн, худлаа дэнслүүлэх нь.

Энэ тухай Улсын ерөнхий прокурор Б.Жаргалсайхан "Н.Номтойбаяр гишүүнийг гэм буруутайг хэн ч тодорхойлоогүй. Үүнийг зөвхөн шүүх тогтооно. Өнөөдөр нотлох баримтын хүрээнд яллах, цагаатгах нотлох баримт цуглаж байна. Зөвхөн яллах талын нотлох баримт цуглаж байна гэж үзэж болохгүй. Тухайн өөрөө цагаатгах нотлох баримтаа гаргаж өгөх ёстой" ярьсан. 

Н.Номтойбаяр гишүүнд холбогдох хэргийн үнэн прокурорын шалтгалтад үндэслэж шүүх эцсийн шийдвэрээ гаргах учраас энэ талаар өнөөдөртөө дүгнэж, таамаглахад эрт гэсэн үг. Хачирхалтай нь, түүнд холбогдох асуудлыг чуулганы нэгдсэн хуралдааны үеэр нэг жигтэй үйл явдал болж өнгөрлөө.

Юу гэхээр Н.Номтойбаяр гишүүнийг бүрэн эрхийг түдгэлзүүлэх тухай тогтоолын төслийг батлах талаар өмнөх санал хураалтыг хүчингүй болгож, дахин явуулсан юм. Сонирхолтой нь, УИХ-ын гишүүн А.Сүхбат уг горимын саналыг гаргасан өөрийн эрхгүй анхаарал татав. 

Угтаа бол тогтоолыг төслийг батлах талаарх горимын саналыг хуульч гишүүдийн зүгээс гаргасан бол илүү үндэслэлтэй, үнэмшилтэй харагдах байв. Адаглаад Хууль зүй болон Төрийн байгуулалтын байнгын хороонд харьяалагддаг хэн нэгэн гишүүн уг горимын саналыг гаргасан бол бодит шалтгаан болох байсан хэрэг. Гэтэл аль, аль Байнгын хороонд харьяалалгүй А.Сүхбат гишүүнээс ийм санал гарсан нь түүнийг хэн нэгний даалгаврыг биелүүлсэн гэж харахаар өөр аргагүйд хүргэв. Улмаар түүний гаргасан горимын саналаар санал хураахад гишүүдийн 83.3 хувь нь дэмжсэн юм. Тэгэхэр А.Сүхбат гишүүнд горимын санал гаргуулах даалгавар өгсөн эрхэм хэн байв гэсэн асуулт энэ өдрүүдэд хөврөх бололтой.

Г.Эрхэс