Шударга өрсөлдөөн хэрэглэгчийн төлөө газраас цаг үеийн асуудлаар мэдээлэл хийлээ.

Мэдээллийн эхэнд тус газрын дарга Б.Лхагва “Зах зээлийн эрэлттэй холбогдуулж зохиомлоор амны хаалтын хомсдол үүсгэсэн зөрчил тогтоогдоогүй. Шалтгаан нь эмийн сан болон эм ханган нийлүүлэх байгууллагын нөөцийн бэлтгэл хангалтгүй байсантай холбоотой.

Гэнэтийн нөхцөл байдлаас шалтаалж хомсдол үүссэн. Манай газраас явуулсан шалгалтаар амны хаалтын татан авалтаа хийх гэж байсан. Зарим эмийн сан, худалдааны үйлчилгээний цэгт амны хаалт зарж байгаа хүмүүс байхад зарахгүйгээр үнийг нь нэмсэн зөрчил гарсан. Төв байгууллагад нь хандаж, эрхийг цуцлах хүртэл анхааруулга, зөвлөмж Эрүүл мэндийн яаманд өгч байгаа.

Эм ханган нийлүүлэх тусгай зөвшөөрөлтэй байгууллагууд хариуцлагатай байж үүргээ биелүүлэх хэрэгтэй. Шатахуун импортлогч компаниудад ч энэ нь хамаатай асуудал. Амны хаалтын үнийг нэмж, хомсдол үүсгэж байгаа асуудалд анхаарлаа хандуулж байгаа эсэхэд мэдээлэл өгөхийг төрийн болон ТББ байгууллагын зүгээс биднээс шаардаж байна. Цаг тухайд нь хариу өгч байгаа. Давуу байдлаа ашиглаж бүтээгдэхүүний үнийг нэмсэн аж ахуйн нэгжүүдэд хяналт тавих ажлыг ТББ-ууд бидэнтэй хамтарч ажиллахыг санал болгож байна.

Үнэ тарифийг шууд зохицуулаад явах эрх манай газарт байхгүй. Улсдаа ганц амны хаалт үйлдвэрлэдэг "Мөнхийн тун" компани амны хаалтыг бөөний үнээр 90 төгрөгөөр зарж байсныг 150 төгрөг болгож зарж байсан. Тухайн компанийг үнээ зохих ёстой түвшинд байлгахыг зөвлөсөн. Хуулийн дагуу торгох гэхээр хууль эрхзүйн зохицуулалт учир дутагдал бий. Хэн нэгнийг хаацайлж байгаа юм биш.

Өрсөлдөөний тухай хуульд нэмэлт өөрчлөлт оруулахаар УИХ-д өргөн бариад байгаа. УИХ иргэд, хэрэглэгчдэд бизнесийн таатай орчныг бүрдүүлэх хуулийг баталж өгөх байх гэдэгт итгэж байна. Энэ аюулт өвчний үед бүтээгдэхүүний үнээ нэмдэг байдалд ААН, байгууллагууд дүгнэлт хийж, бусдыгаа дэмжиж, уриалж ажиллах байх гэж найдаж байна” гэлээ.

С.Сүлд