Цаг үеийн асуудлаар НИТХ-ын төлөөөлөгч С.Мөнхчулуунаас тодрууллаа.

-Шинэ төрлийг коронавирусын дэгдэлттэй холбогдуулан нийслэлээс 500 сая төгрөг төсөвлөсөн гэсэн. Халдварын тархалт дэлхий нийтэд их байгаа энэ үед сар шинийн баярыг гэр бүлийнхээ хүрээнд тэмдэглэх асуудал яригдаж байна?

-Коронавирусын дэгдэлттэй холбогдуулан цагааг сарын баярыг хийхгүй байх ёстой гэсэн асуудлыг иргэдийн зүгээс тавьж байна. Үүнтэй холбогдуулан нийслэлээс олон удаагийн байр суурь илэрхийлсэн. Ялангуяа олон хүн цугласан арга хэмжээ, намын золголт, төрийн байгууллага болон нутгийн зөвлөлийн золголтыг хориглох талаар Улсын онцгой комиссын шийдвэр гарлаа.

Нийслэлээс онцгой комиссын шийдвэрийг авч ажиллаж байгаа. Нийслэлийн Засаг даргад 7 тэрбум төгрөгийн нөөц хөрөнгө байдаг. Нөөцийн хөрөнгийг гамшгийн байдал бий болсон үед зарцуулах ёстой байдаг. Одоогийн байдлаар өвчин бүртгэгдээгүй учраас нийслэлээс хөрөнгө гаргаагүй байгаа гэсэн.

-Бусад улсуудад тусгай объект гаргаж халдвар авсан болон эрсдэлт бүлгүүдээ эмчилж байнө. Хэрэв манай улсад тохиолдол илэрлээ гэхэд тусгай объект бий болгох боломж юу байна вэ?

 -Энэ талаар эрүүл мэндийн байгууллагуудаас тодруулсан. ХӨСҮТ-ийн зүгээс олон улсын жишигт нийцсэн төхөөрөмжтэй. Эхний ээлжинд 50 ортой тусгаарлах тасаг бэлдчихсэн байгаа.

-Орон нутгийн сонгуулийн тухай хуулийг өнгөрсөн пүрэв гарагийн Их Хурлын чуулганаар баталсан. Уг хуулиар аймаг сум болон дүүрэг нийслэлийн ИТХ-д давхар нэр дэвшдэг байхаар зохицуулагдлаа. Та ИТХ-ын төлөөллийн хувьд ямар байр суурьтай байна вэ?

-Энэ заалтыг зөв гэж харж байгаа. Учир нь төрийн захиргааны байгууллагад олон жил ажилласны хувьд дүүргүүдийн Иргэдийн хурлйн даргыг квотоор нь нийслэлийн иргэдийн хуралд гаргах ёстой. Нийслэл чинь өөрөө дүүргүүдээсээ бүрддэг учраас дүүрэг дүүргийн төлөөлөгч Иргэдийн хурлөө төлөөлөн ордог байх ёстой. Ингэснээр дүүрэгт дэвшиж байгаа иргэдийн чадвар чансаа сайжирна гэж харж байна.

-Мөн цагийн хувьд шинэ зохицуулалт оруулсан. Ер нь Орон нутгийн сонгуулийн тухай хуульд оруулсан ИТХ-ын зохицуулалтыг юу гэж харж байна вэ?

-Уг хуулиар санал өгөх цагийг 20.00 цаг, 28 хувийн босгыг босгогүй болгосон. Нэгэнт улсын хэмжээнд зарлачихсан энэ үед иргэд өөрсдөө сонгуулиа өгөх үүрэгтэй.

Сонгууль гэдэг өөрсдийнхөө цаашдын дөрвөн жилийн амьдралыг шийднэ гэдэг утгаар сонгуулиа идэвхтэй оролцох нь чухал. Манай улсад сонгууль өгөх гэж дугаарладаг асуудал байдаггүй. Тиймээс зөв хүн сонгогдсон, сонгогдоогүй гэж бухимдахын оронд иргэд өөрсдөө саналаа өгөх хэрэгтэй.

-Орон нутгийн сонгуулийг Их Хурлын сонгуулиас салгаж явуулах нь хэр зөв бэ?

-ИТХ иргэдээсээ сонгогддог, намд ямар ч хамааралгүй байгууллага шүү дээ уг нь. Улс төрийн сонгуультай хольж явуулдаг байсан нь анхнаасаа буруу байсан юм. Тиймээс зөв зохицуулалт гэж харж байна.

Цаашид ИТХ дахь намын бүлгийн асуудлыг болиулах хэрэгтэй. Энэ нь ИТХ-ыг улстөржүүлдэг хамгийг буруу асуудал юм.

Б.Лхам