УИХ-ын гишүүн Б.Пүрэвдоржоос цаг үеийн асуудлаар тодрууллаа.

-Н.Номтойбаяр гишүүн өөрийн хүсэлтээр чөлөөлөгдөх хүсэлтээ хүргүүлсэн. Гэтэл түүнийг түдгэлзүүлэх шийдвэр гарсан байна. Тухайн өдөр яг юу болсон юм бэ?

-МАН-ын гишүүдийн хуваагдал хэвээрээ байгаа. Өөрөөр хэлбэл, “60 тэрбум”, ЖДҮ-ээрээ хуваагддаг асуудал одоо хүртэл бий. Өнгөрсөн пүрэв гарагийн чуулганаар ч тэд 26, 27-оороо хуваагдаж санал өгсөн. Энэ байдлаас харахад түдгэлзүүлэх асуудлыг тогтоолын төсөл батлахдаа нэг хэсэг нь хурлаа хаяад гараад явчихсан. Ийм байдлаар явж байна. Их Хурлын аливаа онцгой асуудлыг МАН шийддэггүй. АН л шийддэг. Н.Номтойбаяр гишүүнийг түдгэлзүүлэх асуудал АН-ын шийдвэрийн дагуу болсон. Үүнийг сэтгүүлчид ойлгох ёстой.

-Танхимаас яг ямар гишүүд гарч явсан юм бэ?

-“60” тэрбумынхан.

-Яагаад ингэж дүгнэж байгаа юм бэ?

-Тэд нэгийгээ хамгаалж л гарч явахгүй юу.

-УИХ-ын үйл ажиллагааг хэвийн явуулахад саад хийдэг. Хэлэлцэх асуудлаа хэлэлцээд хэлэлцэхгүй асуудал болохоор гараад явчихдаг. Ийм асуудал их гарч байна шүү дээ?

-Намын тодорхой нэгдсэн байр суурьгүй. Хуваагдал нь энэ байдал руу хүссэн хүсээгүй гишүүдийг түлхэж байна.

-Тойрог мандатыг хэрхэн хуваарилах асуудал батлагдсан. Энэ талаар мэдээлэл өгөхгүй юу?

-АН Сонгуулийн тухай хууль батлахдаа нийслэлийн мандатын тоог нэмдэг. Харин МАН хасж, хөдөө орон нутаг руу шилжүүлдэг. АН-ын байр суурь яагаад зөв байгад байна гэхээр манай улсын нийт хүн амын 46 хувь нь нийслэлд амьдардаг. Их Хурлын гишүүд хүнээс сонгогддог шүү дээ. Тиймээс МАН Сонгуулийн хуульдаа газар нутаг гэдэг үг оруулчаад  уг заалтыг биелүүлэхгүй байна. Өнөөдөр нийслэл хотод шийлэх ёстой тулгамдсан асуудал их байна. Тухайлбал, түгжрэл, утаа, гэр хорооллын барилгажилт зэрэг олон асуудал байнаш. Үүнийг шийдэхийн тулд нийслэлээс сонгогдсон гишүүд нь олон байж нэгдсэн лобби явуулж дээрх асуудлыг шийдвэрлэх ёстой. Тиймээс АН ядаж 2016 оны сонгуулиар нийслэлийг 28 мандаттай болгосон. Тэр хэвээр нь байлгаач гэдэг саналыг тавьсан юм.

-Нийслэлд хэчнээн мандат хуваарилсан гэсэн үг вэ?

-МАН нийслэлийн тойргийн мандатыг 24 болгосон. Дөрвөн мандатыг хөдөө орон нутаг руу шилжүүлэх тогтоолын төсөл оруулж ирсэн.

-Ирэх хаврын чуулганаар 17 асуудал хэлэлцэнэ. Гэвч зарим гишүүдийн зүгээс хаврын чуулганаар багтаж хэлэлцэж амжих уу гэдэг асуудал хөндөж байсан?

-Тийм чухал хуулиудыг хэлэлцэхгүй. Ганц, хоёр томилгооны асуудал байж магадгүй. Тухайлбал, хоорондоо ярилцаад томилж чадаагүй элчин сайдын асуудал байна. Мөн Монголбанкны дэд ерөнхийлөгч, Санүүгийн зохицуулах хорооны гишүүд ч байдаг юм уу томилгоотой холбоотой л асуудал үлдсэн.

-Элчин сайд Ц.Цэнгэлийг томилох эсэх асуудал яригдаж байна. Үүнтэй холбогдуулан түүнийг гадаад хэлний ямар ч мэдлэггүй талаар шүүмжлэл их явсан. Уг нь олон улсад нийтлэг гадаад хэлтэй байх шаардлага тавьдаг юм байна. Тэгэхээр түүнийг элчин сайдаар томилох нь зөв үү?

-МАН-ын шийдвэр нэгэнт гарчихсан. Мөн бүлгээрээ хэлэлцээд томилохоор болсон байна лээ. Тэгэхээр тэд олонх байгаа учраас томилох байх. 

Б.Лхам