УИХ-ын Хууль зүйн байнгын хорооноос 2019 оны намрын ээлжит чуулганы ажлын тайлангаа танилцуулж байна. Намрын чуулганы хугацаанд тус Байнгын хороо 18 удаа хуралдаж, 78 хуулийн, 14 тогтоолын төсөл хэлэлцэж, зарчмын зөрүүтэй 118 санал дүгнэлтийг бэлтгэжээ. Хуулийн хэрэгжүүлэлтэд хяналт тавих үүрэг бүхий 6 ажлын хэсэг гаргасан байна. Нийт 42 хууль, 7 тогтоолыг батлуулсан байна.

Байнгын хорооны дарга Х.Нямбаатар “Өмгөөллийн тухай хуулийг батлуулж, өмгөөллийн үйл ажиллагаа өөрийн гэсэн эрхзүйн орчинтой болсон. УИХ-ын гишүүн Н.Учрал нараас өргөн барьсан Оюуны өмчийн хуулийн төслийг хэлэлцүүлэгт бэлтгэн батлууллаа. Монгол Улс хүний эрхийн үндэсний комиссын хуулийг батлан гаргалаа. Цаашид ХЭҮК таван гишүүнтэй үйл ажиллагаагаа явуулна. ХЭҮК-ийн гишүүнийг сонгон шалгаруулах журмыг батлан гаргана. 

Мөн Эрүүгийн хуульд оруулсан нэмэлт, өөрчлөлтөөр хөөн хэлэлцэн хугацаа болон авлигын хэргээр хэрэгсэхгүй болгосон хэргүүдийг дахин сэргээж шалгахаар болж байна. Прокурорын шатанд хэрэгсэхгүй болсон бүх хэрэг сэргэнэ. Улмаар шүүхээр орно. Шүүхийн шатанд хэрэгсэхгүй болсон хэргүүд мөн сэргээгдэнэ. Авлигын хэрэгт холбогдсон хүмүүс шударга шүүхээр орно. Хөөн хэлэлцэх хугацаа дууссан үндэслэлээр хэрэгсэхгүй болсон хэргүүдийг сэргээх юм. Өөрөөр хэлбэл, 22 дугаар зүйлд заасан авлигын хэргүүдийг сэргээнэ.

Хар тамхитай холбоотой асуудлаар бидний хувьд Хяналтын ерөнхий сонсгол явуулж, Хууль зүйн яам, Засгийн газарт хүргүүлсэн. Ерөнхий боловсролын сургуулиудад хүүхдийн эрх зөрчихгүйгээр тест явуулахаар төлөвлөж байгаа" гэв.

С.Сүлд