Засгийн газрын ээлжит хуралдаанаар тэтгэврийн зээлийг нэг удаа тэглэх асуудлыг хэлэлцжээ. УИХ-аас баталсан тогтоолын хүрээнд Засгийн газраас хоёрдугаар сарын тэтгэврээс зээлийн зээлийн төлбөрт суутгалгүй олгосон байна.

Энэ талаар Хөдөлмөр, нийгмийн хамгааллын сайд С.Чинзориг "Хоёрдугаар сарын тэтгэврээс зээлийн хүүг тооцоогүй. Нэгдүгээр сарын тэтгэврээс зээлийн үлдэгдлийг тооцсон зээлийн төлбөр болох 46 тэрбум төгрөгийг хоёрдугаар сарын тэтгэвэр дээр нэмж олгосон. Хоёрдугаар сарын тэтгэврээс 57.9 тэрбум төгрөгийн зээлийн төлбөрийг суутган тооцоогүй. Товчхондоо, хоёрдугаар сарын тэтгэврээс зээлийн төлбөрт суутган тооцох байсан 57 тэрбум төгрөгийг суутгаагүй. Тэтгэвэр хэлбэрээр иргэдийн гар дээр очсон. Тэгэхээр нэг, хоёрдугаар сарын зээлийн төлбөрт тооцох байсан 105 тэрбум төгрөгийг буцаан эзэндээ очсон гэсэн үг. Одоо зээлгүй ахмадуудад нэг сая төгрөгийн үнэт цаас олгох, "Эрдэнэс монгол" компани бондоо гаргаад Хөгжлийн банк баталгаа гаргах үйл явц үлдэж байна" гэлээ.

Сар шинийн баяраас өмнө тэтгэврийн зээлийг зургаан сарын хугацаатай олгох ажлыг эхлүүлэхээр ажиллаж байгаа юм байна.

С.Сүлд