УИХ дахь Өргөдлийн байнгын хороо намрын чуулганаар хийсэн үйл ажиллагааныхаа тайланг танилцууллаа.

Энэ талаар М.Оюунчимэг “Хийн халаагуурт татварын хөнгөлөлт үзүүлэх, айл өрхүүдэд суурилуулах үүрэг даалгавар Өргөдлийн байнгын хорооны 01 тогтоол дээр туссан. Өнөөдрийн байдлаар тогтоолын хүрээнд Засгийн газар, Эрчим хүчний яам, нийслэл хамтран 40 мянган айл өрхийг 4 кВт хүчин чадал бүхий цахилгаан халаагуураар халаахад хамрагдсан. Цаашил энэ тоог нэмэгдүүлэх шаардлагатай. Ер нь цахилгаан халаагуурын тоог нэмэгдүүлэх айл өрхүүд их болж байна. Тиймээс ирэх оны төсвүүдэд эрчим хүчний дэд бүтцүүдэд төсөв мөнгийг илүү суулгах, өөрөөр хэлбэл, утааны эсрэг хоёр дахь аянг бий болгох чиглэлд анхаарал хандуулах хэрэгтэй гэдэг нь ажлын үр дүнд харагдаж байна.

Агаарын бохирдлын эсрэг ажлын хэсэг, байнгын хороо өгсөн үүрэг даалгаврынхаа гүйцэтгэлийг шалгах үүднээс бүх гэр хороололд ажилласан. Утаа мэдрэгч гэр хорооллын айлуудад суурилуулах ажил өнөөдрийн байдлаар 70 орчим хувьтай байна. Үүнээс гадна нийтийн тээвэр агаарын бохирдлын нэгээхэн хэсгийг бүрдүүлж байдаг учраас агаар шүүгч сууриулуулах ажлыг эрчимтэй зохион байгуулж байна. Өнөөдрийн байдлаар 90 хувьтай байна. Энэ бол нэг удаагийн шийдэл. Цахилгаан автобус нэвтрүүлэх ажлыг зохион байгуулна. Энэ хүрээнд туршилтын цахилгаан автобус үйлчилгээнд нэвтэрсэн. Үйл ажиллагааа нь ирэх гуравдугаар сард жигдэрнэ. Агаар орчны бохирдлыг бууруулах чиглэлээр Өргөдлийн байнгын хорооны ажлын хэсэг үр дүнтэй ажиллалаа.

Мөн түрээсийн орон сууцанд хүсэлт УИХ-д ирж байгаа өргөдлийн ихэнх хувийг зонхилж байна. Тиймээс түрээсийн орон сууцанд зорилтот бүлгийн иргэдийг хамруулах талаар анхаарал тавьж ажилласан. Иргэдээс ирсэн өргөдөл, гомдлоос харахад түрээслээд өмчлөх хэлбэр рүү шилжих нь зөв юм байна гэдэг дүгнэлтэд ирсэн.

Өргөдлийн байнгын хороо найман удаагийн хуралдаан, нээлттэй сонсгол хэлэлцүүлэг хийж танилцах ажил зохион байгуулж, Засгийн газарт дөрвөн удаагийн тогтоол, хоёр тэмдэглэлээр үүрэг даалгавар өгсөн. Үүний үр дүнд Буянт-Ухаа II хорооллын гацаад байсан санхүүжилтийг БХБЯ, НЗДТГ, Хөгжлийн банктай хамтран уулзалт зохион байгуулж, үр дүнд 500 орчим тэрбум төгрөгийг  Хөгжлийн банкнаас өгүүлэхээр шийдвэрлүүлсэн. Ингэснээр иргэд түрээсэлж байх хугацаандаа ипотект хамрагдах, улмаар өөрийн эзэмшилд оруулах хувилбарыг ирүүлж байсан учир журманд нь өөрчлөлт оруулсан. Учир нь түрээсийн орон сууцанд хамрагдах хүсэлтэй иргэдийн дийлэнх нь гэр хороололд амьдардаг. Тиймээс энэ чиглэл рүү илүү анхаарна” гэв.

Б.Лхам