Засгийн газрын ээлжит хуралдаан өнөөдөр боллоо. Хуралдаанаар карантины хугацааг цаашид сунгах болон бусад асуудлаар хэлэлцсэн. Энэ талаар Сангийн сад Ч.Хүрэлбаатараас тодруулснаа хүргэе.
-Өчигдөр УИХ-ын дарга Г.Занданшатар худалдаа, үйлдвэрлэл эрхлэгчидтэй уулзаж санал солилцсон. Энэ үеэр бараа бүтээгдэхүүний хил гаалийн татварыг хөнгөлөх, чөлөөлөх талаар асуудлыг хөндөж байсан. Засгийн газраас ямар шийдвэр гарсан бэ?
-Хил дээр төлөгддөг зарим бараануудын татварыг хоёр сараар сунгах шийдвэр гарсан. Мөн нэгэнт чуулган хуралдахгүй байгаа учраас чуулганы хуралдаан эхлэх хугацааг хойшлуулах хуулийн санал гаргах арга хэмжээ орууллаа. Хоёрдугаарт, нүүрс, газрын тосны экспорт хийхийн тулд хятадын талтай ойлголцох ёстой. Одоогийн байдлаар хятадын тал хорио цээр гаргасан байгаа учраас энэ асуудлыг хэрхэн шийдэх зэрэг яриа хэлцэл хийхээр Засгийн газарт танилцуулаад байна. Гуравдугаарт, зарим иргэдийн зүгээс төсвийн тодотгол хийх хэрэгтэй талаар ярьж байна. Төсвийн тогтвортой байдлын тухай хуульд төсвийн тодотгол хийх талаар хуульчилсан байдаг. Хуулиар тодотгол хийх нөхцөл байдал үүсээгүй.
-Нүүрс, газрын тосны экспорттой холбогдуулан улсын төсөвт ихээхэн алдагдал үүсгэж байна. Хятадын талтай тохиролцож чадах боломж хэр байна вэ?
-Сангийн яамны тооцсоноор өнөөдрийн байдлаар өнгөрсөн оны мөн үетэй харьцуулахад 202.7 тэрбум төгрөгийн орлого бага орж ирсэн байна. Цаашид энэ байдал үргэлжилбэл жилийн хугацаанд аваад үзвэл 1 их наяд төгрөгийг орлого дутуу орохоор харагдаж байна.
-Төсвийн алдагдал 2 их наяд төгрөг. Тэгэхээр нөхцөл байдал хүндрэлтэй байгаа юм биш үү?
-Үгүй.
-Банкны зээлийн хүүг царцаах талаар зарим гишүүд санал гаргасан. Зэлийн хүүг царцаах боломжтой юу?
-Монголбанк хариуцах ёстой шүү дээ. Хувийн арилжааны банк хувь хүнд олгосон зээлийг царцаа гээд хэлээд байж болохгүй биз дээ.
Б.Лхам
Сэтгэгдэл (15)