Улсын онцгой комиссын шийдвэрээр БНСУ болон Япон улсаас ирж очих нислэгийг гуравдугаар сарын 10 хүртэл түр хугацаагаар хаагаад байгаа билээ. Карантилсан хугацаа хүртэлх энэхүү агаарын замын сүүлийн нислэгийг Токио-Улаанбаатар чиглэлд өчигдөр хүлээн авах байсан ч цаг агаарын улмаас нислэг хойшлогдсон. Токио-Улаанбаатар чиглэлийн энэхүү хойшлогдсон ОМ502 хуваарьт нислэгийн онгоц өнөөдөр 18.30 цагт Улаанбаатарт газардсан юм. ОМ502 хуваарьт нислэгээр 260 зорчигч Улаанбаатарт ирснээс 223 нь Монгол Улсын иргэн байжээ.

Зорчигчдын 38 нь Сөүл-Токио-Улаанбаатар маршрутаар ирсэн бөгөөд эдгээр иргэнийг УОК-ийн шийдвэрийн дагуу ХӨСҮТ-д тусгаарлахаар болсон юм.

Гэсэн ч эдгээр 38 зорчигчдоос “Тусгаарлагдахгүй” хэмээн ажлын хэсгийнхэнд нэлээд саад учруулсан нэг хүн нь МАН-ын Нарийн бичгийн дарга Ц.Бат-Энх байжээ.

Нисэх буудал дээр нэлээд удсаны эцэст түүний сүржигнэл намын даргад нь хүрснээр гавлуулан ХӨСҮТ рүү хүргэгджээ. Түүгээр зогсохгүй нарийн бичгийн дарга Ц.Бат-Энхийг МАН-ын дарга У.Хүрэлсүх онцгой комиссоос гаргасан шийдвэрийг зөрчиж ёс бус үйлдэл гаргасан учир хүчээр тусгаарлаж, ажлаас нь халах шийдвэр гаргасан бололтой.

С.Сүлд