Ерөнхийлөгч Х.Баттулга БНХАУ-д айлчлал хийгээд эх орондоо ирэв. Хоёр улсын хооронд байгуулсан Иж бүрэн стратегийн түншлэлийн харилцаанд шинэ боломж гаргах талаар болон бусад асуудлыг хэлэлцсэнээс гадна 30 мянган толгой хонь хандивласан нь айлчлалын нэг онцлог байв. Төрийн тэргүүний энэхүү үйлдлийг дэмжсэн нэгэн байхад, шинэ төрлийн коронавирусийн халдварын голомт руу явсныг шүүмжлэх зарим нь ч байна. Мөнгөн тусламж үзүүлэх бус 30 мянган толгой мал хандивласанд эгдүүцэх бусад нь ч гарлаа. Тийм ч байж болох.
Гэхдээ мөнхийн гэх тодотголтой урд хөршдөө хэдэн цаг үдлээд буцсан Ерөнхийлөгч Х.Баттулгын айлчлалыг зөвтгөж харах хэд хэдэн шалтгаан байна.
Нэгдүгээрт, Монгол Улс хуурай газраар хамгийн урт хиллэдэг /4709.6 км/ улс нь БНХАУ. Худалдааны эргэлт, бараа бүтээгдэхүүнийхээ 90 орчим хувийг Хятадаас импортолдог. Эдийн засагт томоохон байр суурьтай явж ирсэн, одоо ч яваа нүүрсний экспортын гол худалдан авагч нь урд хөрш. Үүгээрээ БНХАУ Монголын томоохон хөрөнгө оруулагч, бас ханган нийлүүлэгч. Бид хэдий чинээ урд хөрштэйгөө сайн харилцаатай явна, төдий чинээ улс хоорондын худалдааны эргэлт, түүнээс ирэх өгөөж нь их гэсэн үг.
Хоёрдугаарт, шинэ төрлийн коронавирусийн халдвар Хятадад эрчимтэй тархахтай зэрэгцэн тус улстай худалдаа наймаа, бусад сувгаар холбогддог, тэр хэрээрээ хэдэн тэрбум ам.доллараар хэмжигддэг орнуудын харилцаа түрүүчээсээ хумигдах болсон. Технологийн томоохон компаниуд ч Хятад дахь салбараа хааж, ажилчдаа тийш зорчихыг хязгаарлаад буй.
Нэг үгээр халдварт өвчин гарсантай холбогдуулж, эдийн засаг, гадаад харилцаа нь татарч эхэлсэн БНХАУ-д Монголын Төрийн тэргүүн айлчлал хийсэн нь цөөхөн монголчууд зовох цагт нь нөхрөө хаядаггүйг харуулав.
Цаашлаад шинэ төрлийн коронавирус нь ганцхан Хятадын асуудал биш шүү гэсэн мессежийг Бээжингээс дэлхийн бусад улс оронд өгөв. Үүгээр нь Ерөнхийлөгч Х.Баттулгад харин ч баяр хүргэх хэрэгтэй. Айлчлалын үеэр хэлэлцсэн асуудал нь цомхон байж болох ч агуулга нь том байж чадлаа.
Дэлхийн их гүрнүүдийн төр, засгийн тэргүүн, холбогдох албан тушаалтнууд саяхныг хүртэл БНХАУ-д хийх албан айлчлалаа цуцалж, хойшлуулах хэмжээнд хүрэхтэй зэрэгцэн Монгол Улсын Төрийн тэргүүн үдлээд буцсан нь зүгээр ч нэг цаг хугацааны давхцал биш байж таарна. Тэгээд ч аливаа улс орны төр, засгийн тэргүүний айлчлал сар, жилээрээ урьдаас төлөвлөгдөж, түүнийхээ хүрээнд ажил явдаг, албан ёсынх болж хэрэгждэг.
Хэн нэгний сэтгэлийн хөөрлөөр өнөөдөр шийдвэр гаргаад, маргааш нь явчихдаггүй гэсэн үг.
Ерөнхийлөгч Х.Баттулгын БНХАУ-ыг зорьсон шалтгаан ч өмнө нь дипломат шугамаар төлөвлөгдсөн албан ёсны айлчлалын нэг байсан байж таарна. Тэглээ гээд тэрбээр бусдын адил айлчлалаа цуцалж, хойшлуулсангүй. Эсрэгээрээ эртнээс хил залгаа, өнө мөнхийн харилцаатай ирсэн БНХАУ-ыг зориод ирсэн нь л чухал. Айлчлалын гол агуулга нь ч энэ байв. Шинэ коронавирусийн халдварын голомтыг зорьсон, 30 мянган хонь хандивлалаа хэмээн ярих нь хоёрдугаар асуудал гэсэн үг.
Төгсгөлд нь БНХАУ-ын дарга Ши Жиньпин “Надад дуслыг өгсөн ч би голыг эргүүлэн өгнө” хэмээх Күнзийн сургаалийг, мөн Монголын “Зовох цагт нөхрийн чанар танигдана” гэсэн зүйр үгийг иш татан чин сэтгэлийн талархал илэрхийлснийг Ерөнхийлөгчийн Тамгын газрын албан мэдээнд эш татан онцолжээ.
Өдгөө тусгай үүргийн онгоцоор өчигдөр 22:20 цагт "Чингис хаан" олон улсын нисэх онгоцны буудалд газардсан Ерөнхийлөгч болон түүнийг дагалдан явсан албан ёсны төлөөлөгчдийг шинэ коронавирусийн халдварын тархалттай холбогдуулан авч буй урьдчилан сэргийлэх арга хэмжээний хүрээнд зохих журмын дагуу тусгаарлаад байна. Ерөнхийлөгч Х.Баттулгыг Сайд нарын гэх тодотголтой II эмнэлэгт тусгаарласан бол Гадаад Харилцааны сайд Д.Цогтбаатар, Элчин сайд Д.Ганхуяг, Онцгой Байдлын Ерөнхий Газрын дарга, хошууч генерал Т.Бадрал, Ерөнхийлөгчийн Тамгын газрын дарга Ө.Шижир, зөвлөх Т.Тэгшжаргал нарыг ОБЕГ-ын харьяа амралтад тусгаарласан байгаа юм.
Г.Эрхэс
Сэтгэгдэл (23)