х
Засгийн газрын өнөөдрийн хуралдааны шийдвэрийн талаар Сангийн сайд Ч.Хүрэлбаатар танилцууллаа.
Тэрбээр “Засгийн газрын өнөөдрийн хуралдаанаар найм, есөн заалттай тогтоол баталлаа. Тухайлбал, нүүрс, газрын тос болон бусад ашигт малтмалын тээвэрлэлтийн ариутгалын шаардлагыг хангаж байж экспортлох үйл ажиллагааг хангана. Ингэхдээ хилээр гараад өдөртөө буцаж орж ирэхээр зохицуулна. Хоёрдугаарт, өндөржүүлсэн бэлэн байдалд шилжсэнтэй холбогдуулан нийгмийн даатгалын шимтгэлээ төлж чадаагүй тохиолдолд оногддог торгуулийг тооцохгүй. Гэхдээ үйл ажиллага нь хэвийн үргэлжилж байгаа аж ахуйн нэгж төлөх ёстой. Энэ хугацаанд хамрах татварыг хугацаанд нь тушаагаагүй тохиолдолд оногддог алдангийг нэг удаа чөлөөлөх мөн түрээсийн төлбөрөө буулгасан түрээслэгч нарт хуулийн заалт боловсруулсан.
Төсвийн тодотголын тухай их ярьдаг. Энэ нөхцөлд улсын төсвийг тодотгохгүй. Урсгал зардалд хэмнэлтийн горим ач холбогдлоор нь эрэмбэлж санхүүжүүлнэ. Улсын хөрөнгө оруулалтын ажил тухайлбал, цэцэрлэг, сургууль, эмнэлгийн барилгын ажлыг эрчимжүүлэх ёстой. Гэхдээ иргэдийн эрүүл мэндийг нэгдүгээрт тавина. Энэ хүрээнд УОК-оос гаргасан шийдвэр, арга хэмжээ үргэлжилнэ. Үүний хажуугаар эдийн засгаа дэмжих бодлогыг зэрэг хэрэгжүүлэх санал орж ирнэ. Өнгөрсөн хугацаанд Монгол Улсын суурь үзүүлэлтийг сайжруулах, өрийн дарамтыг бууруулах чиглэлээр ажилласантай холбогдуулан манай улс жил орчмын хүндрэлийг даван туулах хэмжээний чадалтай болж чадсан. Тиймээс бусад улс орноос зээл авахгүйгээр нөхцөл байдлыг аваад явчих бүрэн чадамжтай.
Эдийн засаг хэрхэн өөрчлөгдөх талаар дэлхийн бусад улс орнуудын томоохон эдийн засагч, судалгааны байгууллагаас гаргасан судалгаанд үндэслэн шийдвэр гаргах хэрэгтэй. Түүнээс биш цуу яриа, сэтгэлийн хөөрлөөр шийдвэр гаргах эрх байхгүй. Үүссэн нөхцөл байдалтай холбогдуулан хөл хорион эдийн засагт нөлөөлөх нөлөөлөл нь V хэлбэртэй гэж эдийн засагчид үзэж байгаа. Энэ нь эдийн засаг унаад эргэн хурдан сэргэнэ гэсэн үг юм. Тиймээс дээрх судалгаанд үндэслэн эдийн засгийн өөрчлөлтөө хийсэн.
ОУВС-гийн хувьд хөтөлбөр үргэлжлээд явж байна. Уг нь гуравдугаар сард ОУВС-гийн төлөөлөл ирнэ гэсэн ч хөл хориотой холбогдуулан ирж чадахгүй болсноо мэдэгдсэн. Хөтөлбөр 80-90 хувийн үр дүнтэй хэрэгжсэн гэж үзэж байна. Хөл хориотой холбогдуулан улсын төсөв өнгөрсөн оны мөн үетэй харьцуулахад 210 орчим тэрбум төгрөгөөр хумигдсан. Гэхдээ оны төгсгөлд төсвөө нөхөх боломжтой” гэлээ.
Б.Лхам
Сэтгэгдэл (2)