Гэрэл зургийг А.Ариунзаяа

У.Хүрэлсүхэд нэг сайн чанар байна. Хийе гэсэн бол хийдэг, түүнийгээ цаг алдалгүй шуурхай албажуулдаг. Үүнийгээ ч тэрбээр дэлхийн улс орнуудад тахалын хэмжээнд тархах болсон шинэ төрлийн коронавирусний дэгдэлтэй энэ өдрүүдэд харуулав. Магадгүй Намын даргын эрх мэдлээс гадна гүйцэтгэх засаглалын тэргүүн Ерөнхий сайдын албатай хүнээс ийм хэмжээний зангараг гарах л ёстой гэж зарим нэг нь хэлж болох. Тэр нь ч үнэн. Гэхдээ идэр залуудаа цэргийн оператив командын эрдэмд суралцсан офицер У.Хүрэлсхүхэд дадсан зан нь төрийн бүхий л шатанд шуурхай гарч, цэргийн тушаал мэт хэрэгжиж байгаа нь өнгөрсөн өдрүүдийн үйл явдлаар илүү тодорч байх шиг. Тэдгээрээс дурдвал:

Засгийн газраас тусгай үүргийн онгоц нисгэж, БНХАУ-ын Ухань хотоос 31 оюутан, бага насны нэг хүүхдийг эх оронд нь авчрах ажлыг амжилттай зохион байгуулав. Энэ хүрээнд нисэх багийн гишүүд болон инжeнeр тeхникийн ажилтан, мэргэжилтэн гээд нийт 59 хүнийг ХӨСҮТ-д тусгаарлалаа.

Гуравдугаар сарын 2-ныг хүртэл хөдөлгөөн хязгаарлах шийдвэрийг сунгах санал Засгийн газрын хуралдаанд оруулав.

Шийдвэрийн хүрээнд хөдөлгөөн хязгаарлахаас өмнө хөдөө явсан иргэд буцаж яаж ирэх вэ гэдэг асуудал үүссэн ч, гэрийн хаягаар нь хот руу оруулах шийдвэрийг Улсын Онцгой комиссоос эцэслэсэн. 

Шинэ төрлийн коронавирусний тархалтаас урьдчилан сэргийлэх зорилгоор Нийслэлийн Онцгой комисс хуралдаж, сар шинийн өдрүүдэд буюу хоёрдугаар сарын 24-нөөс 27-ныг өдрийг хүртэл нийтийн тээврийн үйлчилгээг бүрэн зогсоохоор шийдвэрлэв. Улмаар Улсын онцгой комиссын хуралдаанаар баярын өдрүүдэд хэрэгжүүлсэн улс, хот хоорондын автозамын зорчих хөдөлгөөний хязгаарлалтын хугацааг гуравдугаар сарын 2-ныг дуустал сунгалаа.

Засгийн газраас тогтоол гаргаж хамгаалах хувцас хэрэглэлд шаардагдах төсвийг баталлаа. Өмнө нь 4.2 тэрбум төгрөгийн төсөв баталсан байсан бол сая дахин 6.5 тэрбум төгрөгийн төсвийг нэмж батлав.

Төрийн золголт, нутгийн зөвлөл, албан байгууллагууд, хамт олны золголт хийхгүй байх, Сар шинийн баярын Үндэсний бөхийн барилдаан зэрэг нийтийг хамарсан спорт, урлаг, сургалтын арга хэмжээг явуулахгүй байхыг үүрэгдэв.

Улсын Онцгой комиссд үүрэг даалгаврууд өгч, БНСУ-аас ирэх, явах нислэгүүдэд яаралтай арга хэмжээ авах чиглэл өгөв. Энэ дагуу Монгол Улс руу агаарын хөлгөөр ирж байгаа эрсдэл нэлээд өндөр байна гэж үзэж, Инчеон болон Бусаны бүх нислэгийг 2020 оны гуравдугаар сарын 2-ны өдрийг дуустал түр хугацаагаар зогсоох шийдвэр гаргав.

Монгол Япон хоорондын хоёр талын  нислэгийг  хоёрдугаар сарын 28-наас гуравдугаар сарын 11-ний өдрийг хүртэл зогсоохыг Зам тээврийн хөгжлийн сайдад даалгав.

Эрхүү, Улаан-Үдийн чиглэлийн нислэгийг энэ сарын 11-нийг хүртэл цуцлах шийдвэрийг Улсын онцгой комиссоос гаргав.

Төрийн албан хаагчдын гадаад айлчлал, томилолтыг хоёрдугаар сарын 27-ноос зургадугаар сарын 30-ныг дуустал зогсоохыг Засгийн газрын хэрэг эрхэх газар, Засгийн газрын хэрэгжүүлэгч болон тохируулагч агентлагын дарга, аймаг нийслэлийн Засаг дарга нарт үүрэг болгов.

Солонгос улсын болон тус улсаас ирж байгаа иргэдийг гуравдугаар сарын 30-ныг дуустал хилээр нэвтрүүлэхгүй байхыг Гадаад харилцааны сайд Д.Цогтбаатар, Хил хамгаалах газар, Гадаадын иргэн харьяатын дарга нарт даалгав. 

Нүүрсний экспортыг эхлүүлэх бэлтгэл хангагдаагүй учраас нүүрсний экспортыг эхлүүлэх ажлыг гуравдугаар сарын 15 болгож хойшлуулав.

Ийнхүү БНХАУ-ын Хубэй мужийн Ухань хотоос иргэдээ эх оронд нь авчрах ажлыг Засгийн газраас эхлүүлж, Сар шинийн өдрүүдэд хөл хорио тогтоох, БНСУ, Японы чиглэлийн нислэгийг тодорхой хугацаанд цуцалж, хойшлуулах шийдвэрээр үргэлжилж байна.

Хэрвээ У.Хүрэлсүхээс өөр Ерөнхий сайд байсан бол тодорхой шийдвэрт хүрч чадахгүй, дүлэгнэж суусаар байгаад цаг алдаж, аюулын харанга дэлдэх байсныг үгүйсгэх аргагүй.

Харин тэр үүрэгдэж чадаж байна. Түүнийг нь шат шатандаа цэргийн тушаал мэт биелүүлж байна.

"Ард иргэдэд зөвөөр ойлгуулах хэрэгтэй. Засаглах цаг ирсэн байна. Нийт ард түмний төлөө хааж, хорихоос өөр аргагүй. Ингэж байж энэ нөхцөл байдлыг даван туулна. Тогтоол шийдвэр зөрчвөл арга хэмжээ авна. Иргэн хүн иргэн хүнийхээ үүргийг биелүүлэх ёстой.

Нэг, хоёр хүний эрх ашиг биш. Улс үндэстний аюулгүй байдалтай холбоотой асуудал. Тиймээс хорио цээрийн хугацааг сунгах ёстой. Тэгэхгүй бол хорионы цаг дуусангуут золгуут эхэлнэ. Коронавирус гэлтгүй ханиад томуу дагаад дэгдэнэ. Хүчний байгууллагууд ажлаа хийх цаг ирсэн. Хэл ам гарна гэж айх ёсгүй. Улсын эрх ашиг чухал" хэмээсэн түүний үг сайнаар төгсөх цаг ойрхон байна.

Г.Эрхэс