Ерөнхийлөгчийн Тамгын газрын даргын албан тушаалаа өгч, АН-ын дарга С.Эрдэнийн ахлах зөвлөхөөр ажиллах болсон З.Энхболд улс төрд буцаж ирж буйгаа зарлах болсон. Тэрбээр нэн түрүүнд Тавантолгой орд газрыг тойрсон асуудлыг шүүрэн авч, 30 хувийн хувьцааг олон улсын хөрөнгө биржид арилжаалах сайд Д.Сумъяабазар тэргүүтэй албаны хүмүүст шүүмжлэлтэй хандаж эхлээд буй. Энэ талаараа ч хэд хэдэн хэвлэлд байр сууриа илэрхийлээд амжсан.

Гэвч АН-ын даргын ахлах зөвлөхийн энэхүү яриа ташаа мэдээлэл гэдгийг Сангийн сайд Ч.Хүрэлбаатар тодотгожээ. Тэрбээр “Хувьчлах тухай анх удаа сонсож байна. Олон улсын зах зээлд IPO хийх тухай шийдвэр, УИХ, Засгийн газар дээр гарсан.

Ерөнхийлөгчийн Тамгын газрын дарга байхдаа энэ асуудлыг дэмжиж байсан юм байна гэж ойлгосон.

Гэтэл АН Тамгын газарт очихоороо байр суурь нь өөрчлөгдсөнийг гайхаж байна. "Уйддаг юм уу, яадаг юм" гэдэг юм болоод байх шиг байна.

Хоёрдугаарт, IPO гаргана гэдэг амар ажил биш. 2021, 2022 онд гарах ажил. Компани дээрээ судалгаа хийнэ, үнэлнэ, хууль эрх зүйн орчныг нь тогтооно. Шат дараалсан арга хэмжээ авна.

Хөрөнгө оруулагч нартаа танилцуулах ажил хийнэ. Тэндээс тодорхой хувийг олон улсын хөрөнгө оруулагч нарт оруулъя.

Ингэж байж манайх хөрөнгийн зах зээлээ хөгжүүлье, уул уурхайн салбараа олон улсын жишгээр хөгжүүлье гэдэг шийдвэр гарсан” гэжээ.

С.Сүлд