Ерөнхийлөгчийн Тамгын газрын даргаас АН-ын дарга С.Эрдэнийн ахлах зөвлөхөөр томилогдоод буй З.Энхболд Эрдэнэс Тавантолгойг хууль бусаар хувьчлах гэж байна гэх утгатай мэдээллийг түгээсэн. Тэгвэл уг асуудалтай холбогдуулан ЗГХЭГ-ын дарга Л.Оюун-Эрдэнэ мэдээлэл хийлээ.

Тэрбээр “Сонгууль угтсан улс төржилт эхэлсэн байна. Мэдэн будилдаг, мэддэг зүйлээ мэдэхгүй гэдэг, зориуд мушгин гуйвуулдаг цаг ирсэн байна. Өнөөдөр ҮАБЗ-ийн нарийн бичгийн дарга А.Гансүхэд төрийн болон албаны нууцын дагуу ил болгох саналыг хүргүүлсэн. Энэ асуудал одоогоор нууц хэвээр байгаа учир нарийн зүйлийг ил болохоор хэлье. Тавантолгойн нүүрсний уурхайд авч хэрэгжүүлэх зарим арга хэмжээ гээд ордыг эдийн засгийн эргэлтэд оруулж, төмөр замтай холбоотой дэд бүтцийн ажлыг хийх ҮАБЗ-ийн зөвлөмж гарсан. 2018 онд шүү дээ.

ҮАБЗ-тэй хамгийн ойр ажилладаг хүн бол Ерөнхийлөгчийн Тамгын газрын дарга. Үүнийг та бүгд мэднэ. З.Энхболд гэж хүн Ерөнхийлөгчийн Тамгын газрын даргаар ажиллаж байх үед нь энэ зөвлөмж гарсан.

Буруу гэж бодсон юм бол зөв болгоход талаар ажиллахгүй яасан юм бэ. Зүүн баянгийн төмөр замд шулуухан хэлэхэд Ерөнхийлөгчийн багийнхан манлайлж оролцсон.

Томоохон санхүүжилттэй ажлууд үргэлжилж байна. Өндөр санхүүжилттэй олон арга хэмжээний нэг нь энэ. Үүнтэй холбоотой УИХ-ын тогтоол гарч, Засгийн газарт ирсэн. Гэхдээ Засгийн газраас хэрэгжүүлээгүй. Учир судалгааны төвшинд үргэлжилж байгаа ажил учраас тэр.

Туйлын болгоомжтой харьцах ёстой гэдэг байр суурь би илэрхийлсээр ирсэн. Засгийн газрын хуралдааны тэмдэглэлийг аваад үзэрэй. Яагаад гэвэл, АН-ын увайгүй байдал удаа дараа давтагдаж байгаа учраас болгоомжтой байдлаар хандаж ирсэн. Өнөөдөр энэ бүхэн батлагдлаа.

Тавантолгойн ордыг эдийн засгийн эргэлтэд оруулж, IPO гаргах нь зөв алхам мөн үү гэвэл мөн. Судалж байна.

Үүнийг дагаад дэд бүтцийн ажил зогсох эрсдэлтэй. Үүнийг би анхааруулах ёстой.

Дахиад нэг зүйл бий. Монголчууд бид төрийн албанд ажиллаж байсан экс дарга нарынхаа асуудлыг цэгцлэхгүй бол болохгүй нь ээ. Ерөнхийлөгчийн Тамгын газрын дарга байхдаа нэг асуудлыг огт өөрөөр ярьдаг. Гараад АН-ын даргын ахлах зөвлөх болонгуутаа төрийн нууцтай холбоотой асуудлыг гаргаж ирээд өөрөө огт мэдээгүй юм улс төр хийдэг. Өөрөөр Их хурлын дарга байхдаа Эрдэнэтийн 49 хувийг мэдэхгүй гэдэг худлаа.

Их хурлын дарга хүн Их хурлаар оруулаагүй ийм том асуудлыг мэдэхгүй байх боломжгүй. Одоо юу гэж байна вэ гэхээр “Би үүнийг мэдэхгүй. Ч.Сайханбилэг хийсэн” гэж байна. Төрийн алба ийм байж болохгүй.  

Яг үнэндээ улс оронд хүнд цаг ирлээ. Дэлхийн 80 орчим улсад коронавирусний халдвар гарлаа. Ийм үед улс төр хийх цаг алга. Цаг үеэ мэдрээч ээ. Стратегийн орд газрыг хууль бус оролдлогод цэг тавъя гэж байгаа бол зугтаагаад явчихсан Ц.Элбэгдорж, Ч.Сайханбилэгээ АН-ынхан олж ир.

Хариуцлагатай хэлье. У.Хүрэлсүхийн Засгийн газар ямар нэг байдлаар хууль бус зүйл хийхгүй. Үүнд итгэж болно.

Бид хэзээ ч Дубайн гэрээ шиг зүйл хийхгүй. Тавантолгойн ордыг хятадууд зарах нууц тохироо хийхгүй. Эрдэнэтийн 49 хувийг төрийн мөнгөөр аваад хувийн компанид өгөх зүйл хийхгүй. Бид хэзээ ч Ил тодын тухай хууль баталж, Монгол Улсын “Сааралт жагсаалт”-ад орох зүйл хийхгүй.

Өнөөдөр макро эдийн засгийн үзүүлэлт сайжирч байна. Төрийн сахилга бат сайжирч байна. АН-ын дөрвөн жилийн арчаагүй завхралыг засах гэж үйлээ үзэн ажиллаж байна.

Шийдэл хайсан зүйл дээр улс төр хийгээч ээ.

Хэрвээ мэтгэлцэх гэж байгаа бол мөрийн хөтөлбөр, шийдлээр улс төр хий. Айлуудаар ном тарааж байна гэсэн. Хорио цээрийн үеэр шүү. Халдвар тархвал яах юм бэ. Сөрөг хүчний нөхдүүд суудлаа ол" гэлээ. 

Г.Маргад